Dem erwirdigen in Gott und geistlichen herrn hern Johannsen abbte zu Lambach meinem genadigen gunstigen lieben herrn empewtt ich Wolfganng Tremel zu Sweinegkh in Zwispaltner pharr gesessen mein gehorsam willig undertanig dinst bevor und fueg ewren genaden zu wissen, das ich all mein erbschaft und gerechtikhait, so ich gehabt hab an und auf dem guet genant auff der lacken zu Marschalling in Gaspoltshover pharr gelegen in Starhemberger lanndtgericht, das dan dinstpar ist ewrer genaden gotshawss Lambach, zu statem ewigen kawff verkawfft hab meinem lieben swagern Wolfganng Sneider, der hewslich darauff sitzt, Margrethen seiner elichen hausfrawn und allen in baiden erbm, dy sew habm oder noch gewingen, umb ain summa gelts, daran mich yetz und furan wolbenuegt und der von inn entricht bin zu rechten tagen an allen schaden. Darauff bitt ich ewr gnad mit allem sunderm vleis welle demselben meinem lieben swagern Wolfganng Sneider, Magrethen, seiner hawsfrawn und allen irn baiden erbm ain genuegsamen lanndtlewffigen kawfbrieff daruber verfertigen und wan ewr gnaden das also gethan hat, so gelob ich ewern gnaden fur mich und all mein erbm in ewer gnaden verfertigung und insigl nicht zu reden wenig noch vill, sunder mit meinen willigen dinstn umb ewr gnaden verdienen. Und des zu warm urkhundt schickh ich ewren gnaden den offen bettbrieff verfertigt durch meiner vleissigen gepett willen mit des erbern weisen Wolfganng Hainpuecher an den zeittn ewr gnaden ambtman aigen zurugk aufgedruckten petschad, doch im, sein erbm an schaden und unengolltn ewr gnaden gotshawss an seiner vardrung und rechten in allen sachen, under das petschad ich mich obgemellter Wolfganng Tremel fur mich und all mein erbm verpint bei meinen trewen aidesstat alles das war und statt zu hallten inhallt des betzetl. Zewgen bittens umb ewr gnaden insigl und umb das petschad sind dy erbern Hanns Stegmair zu Kirchdorff, Jorg Vaschang zu Gaspoltshoven, Michel Mulpacher und meniger genueg. Geschehen an erichtag vor Johannis und Pauli der wetterherrn nach Christi geburdt viertzehenhunndert und im drew und newnntzigisten jarnn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 389f, Nr. 3321