Wir Johanns von Gots gnaden abbt zu Lambach, bekennen mit dem brief, daz fur unns komen ist Leonhart, Hannsen Hynnterleyttner weilend zu Hynterleytten gesessen sun, und hat mit wolbedachtem mut und gutem willen recht und redlichen gemacht und gegeben seiner lieben eelichen hawsfrawen Anna zehen phund phenning guter lanndes werung zu rechter freyer morgngab nach dem lanndes rechten ob der Enns auf aller seiner erbschaft und gerechtikait, so er ungevarlichen hat an und auf der mul zu Hynnterleytten in Offnhawser pharr und irer zugehorung, erbrecht von unns und unnserm gotshaus, und pat unns darauf mit diemutigem vleis, daz wir die yetzbemellten zehen phund phenning morgngab auf der berurten seiner erbschaft und gerechtikait der genanten seiner hawsfrawen genedigklichen geruchten zu bestatten und zu verleihen, daz wir dann allso hiemit wissenlich in kraft des briefs getan haben, was wir in rechtlichen daran bestatten und verleihen sollen oder mugen, doch daz man unns und unnserm gotshaws alle jar jerlichen davon raichen und dienen soll lawt der alten erbbrief, so daruber sein und unnsers gotshaws urbarpuch. Es ist auch der obbenant Lienhart fur sich und all sein erben der bestymbten zehen phund phenning morgngab auf der berurten seiner erbschaft und gerechtikait der genanten seiner hawsfrawen Anna recht gewer und furstand fur all rechtlich ansprach, wo und wann ir des not und durft beschicht mit dem rechten, alls dann sollichs gmechts morgengab und lanndes ob der Enns recht ist angevar. Wer auch nachster erb ist oder wirdet nach des benanten Lienharten tod und abgangkh, der hat alle jar jarlichen losung von der benanten seiner hawsfrawen und iren erben umb dy berurten zehen phund phenning morgengab und nit hocher albeger zu unnser lieben frawentag der liechtmessen viertzehentag vos oder nach ungevarlich und sunst zu kainer anndern zeit im jar. Wir offnen auch, daz sy kainerlay wandlung damit nit haben sollen in kainerlay weis on unnser hanndt und guten wilen und sollen unns auch alles das davon leiden und dulden, daz annder unnsers gotshaws erbler gen unns leident und duldent unvertzigen unnsers gotshaws rechten in allen sachen. Zu urkund geben wir in des allso den offenn brief besiglten mit unnserm anhangunden insigl, der geben ist alls man zallt nach Cristi geburd viertzehenhundert und darnach im drew und newntzigisten jar an erichtag nach sand Michels tag.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 394-396, Nr. 3326