Dem erwirdigen in Gott und geistlichen herrn herr Johannsen, abbte zu Lambach unnserm gnedign herrn, enpewt ich Lienhart Peckh zu Gebaltzkirchen, ich Michel Zawner zu Zaishatting, dy zeit zechlewt des wirding gotshaws und pischoff sand Nicla zu Gebaltzkirchen, unnser gehorsam willig dinst bevor. Wir fuegen ewren gnaden zu wissen, das wir zechlewt anstat des bemelten gotshaws ain summa gelts gehabt habm an und auf dem guetlein zu Niederentaren, genant das Aigengueltl, derselben summa gelts wir zechlewt anstat des egenanntten gotshaws von dem beschaiden Hannsen zu Puechlewten, Anna, seiner hawsfrawn schon und recht entricht sein worden an allen schaden und abgang, und ich Hanns Sneider auf dem Pachmansperg fueg ewrn gnaden zu wissen, das ich all mein erbschaft und gerechtikait, so ich gehabt hab auf dem obbenanten Aigenguetlein zu Niderentarn in Gebaltzkircher pharr gelegen in Starhenberger gericht, das dan urbar dinstpar ist euch und ewrer gnaden gotshaws zu Lambach zu statem ewigen kawff verkawft hab dem bemelten Hannsen zu Puechlewtten, Anna seiner hawsfrawn und allen irn erbm jungen und alten, dew sew habm oder noch gewingen, umb ain summa gelts, daran mich yetz und hinfur wolbenuegt und der von in recht und schon bezalt bin worden an allen schaden und abgang. Darauf bitt ewr gnaden mit allem sunderm vleis, welle demselben Hannsen zu Puechlewten, seiner hawsfrawn Anna und allen irn erbem jungen und alten ain genuegsamen landt lewfigen kawfbrief daruber unnd darumben verfertigen, und wan ewr gnaden dan das getan hat, so gelob ich ewren gnaden fur mich und all mein erbm in ewr gnaden verfertigung und insigl nicht zu reden vil noch wenig, sunder mit unsern willigen dinsten umb ewr gnaden verdienen. Und des zu warm urkundt schicken wir ewr gnaden den offen betbrief, verfertigt durch unnser vleissigen gepet willen mit der erbern weisen Wolfgang Hainpuecher, an den zeitn ewr gnaden ambtman, Wolfgang Sigkhinger zu Sigkhing, Lienhart Sneider zu Gebaltzkirchen der dreyer aufgedruckten petschaft, doch in, irn erbm an schaden, under dye petschadt wir uns al obgemelt verpintten bei unnsern trewen an aidesweis alles das war und stat zu haltn in halt des briefs. Zewgen der sachen und der gepet umb ewr gnaden insigl und umb dye gegenwurtigen petschadt sind dy erbern Wolfgang zu Michelnaw, des von Polheim ambtman, Marx zu Swent, Thoman zu Wielting und mer erberlewtt genueg. Geschehen an sontag letare in der vasten nach krists gepurde viertzehenhundert und darnach in dem vierundnewntzigisten jarn der myndern zall.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 418f, Nr. 3343