Ich Liennhart und ich Hanns, gebrueder die Vetzinger zu Hawnspergk, bekhennen fur unns und all unnser erben mit dism offnn brieve, wo der furkumbt, das wir recht und redlichn verkawfft und zu stet zu kawffn geben habn dem wirdign gotshaws sand Jacob dem spital zu Gmunden und den armen durftign dar inne unser guet zu Rewttarn in Lakircher pfarr gelegn, darauf dan Wolfganng Lasser sitzt und nu kunftigklich demselbn spital inhalt des kawffrechttbriefs, so er von unns hat dienn und gehorsam thun soll, dasselb guet dan freis aign ist. Also habn wir dem egenanten spital zu Gmunden das berurt unnser guet und gult darauf allen irn rechtlichn zuegehorungen umb ain summa gelts, der wir zu rechten tagn und on schaden bezalt sein, ubergeben und eingeantburt aus unser, unnser erben in des bemelten spitals zu Gmunden gwaltsam nutz und gwer der mainung, das das bemelt spital solh gult mit allen iren zuegehorungn nufuran innehaben, nutzn, niessen, versetzn und verkauffn mogn on unnser und unnser erben irrung und wieder sprechen. Ich vorbenanter Liennhart und ich Hanns gebrueder die Vetzinger seinn auch solhs kawffs fur unns und all unser erben des obbestimbten guets und gult zu Rewttarn vermelts spitals zu Gmunden recht gweren und furstanndt fur all rechtlich ansprach alsdann solh guets freis aign im lannde Osterreich ob der Enns recht ist, ongeverde. Ging in aber an dem kauff und gwerschafft icht ab, des sew mit recht schadn nemenn, dieselben scheden all zu sambt dem kauff solln wir ine ablegn richttigmachen und widerkernn. Sew solln auch das alles haben und bekomen zu unns und auf allen unsernn anligunden und varunden guetern ungeverlich. Des zu warer urkundt gebn wir obgenantem spital disn brief besigeltenn mit unsernn obgenanten Liennharten und Hannsen gebruedern den Vetzingern aign hie anhanngennden innsigelnn. Geben nach Cristi unsers lieben herren geburde tausent vier hundert und im vierundnewnntzigistnn jaren, eritags nach dem sonntage quasimodogeniti.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 419f, Nr. 3344