Erbirdiger in Gott und geystlich besunder lieber herr mein gar willig dinst sein euch allczeitt bevor. Es ist auf guet vertrauen zu mir komen eur hindersass der Pfluegl zw nydern Schuczing, der dan ettbas in yrrung stett mit ewerm nachrichter Kochloffl, da durich er sich besargtt und tarsich dahaim nicht entthalltn und hatt mich mit vleiss gepettn, euch von seinen wegen zw schreiben und zw bitten, das ir im gelaitt wellet geben, so er peutt er sich der sachen zw verhor fuer euch zw komen, wo er dan unpillich gehandlt hiett, nach eur erkanntnuss ab tuen. Dar auf bitt ich euch alls mein gunstigen herrn, ir wellet im ainen maned sicherhaitt und gelaitt geben und im in der zeitt zw verhor ainen tag fuer euch seczen und nach gelegenhaitt der sach beschehen lassen, was pillich ist, das will ich gar willig umb euch verdien und latt in meiner bette bey euch genyessen, alls ich dan ein sunder vertrauen zw euch hab, und bitt dar auf eur verschriben antbuertt. Datum Grebmyng an sambstag vor dem aschtag etc. lxxxxiiii.

Michel Oberhaimer