Dem erwirdigen in Gott und geistlichen herrn herr Johannsen, abbte zu Lambach, meinem genadigen lieben herrn empewtt ich Anna, des Paulsen Schinagl zu Waltenperg eelichew hawsfraw, mein gehorsam willig undertanig dinst bevor und fueg euch zu wissen, das ich all mein erbschaft und gerechtikait, so mich von meinem vater an erstorben ist an und auf der hueb zu Haslach mit aller rechtlicher zugehorung in Geboltzkircher phar gelegen in Starhemberger gericht, und ist dinstpar urbar euch und ewrer gnaden gotshawss Lambach, zu statem ewigen kawff verkawft hab dem beschaiden Hannsen zu Haslach der yetzund hewslich darauff siczt, Elspechten seiner hawsfrawn, und allen irn paiden erbm, dy sew habm oder noch kunftigklich gewingen umb ain summa gelts, der ich von yn schon und recht zu rechten tagn an allen schadn und abgang betzallt und entricht pin. Darauff bitt ich ewr gnad mit allem und sunderm vleis, welle demselben Hannsen zu Haslach, Elspechten seiner hawsfraw und alln irn baiden erbm ein genuegsamen lanndtlewffigen kawffbrieff daruber verfertigen, und wan ewr gnaden dan das also gethan hat, so gelob ich ewr gnaden fur mich und all mein erbm und manigklichs von meinem wegen in ewr gnaden verfertigung und in sigll nicht zu reden vill noch wenig in khainerlai weis, sunder mit meinem willign dinstn umb ewr gnad verdienen. Und des zu warm und steten urkund schickhe ich ewrn gnaden den offen bettbrieff unnder versorgnuss verfertigt durch meiner vleissigen gepett willen mit des erbern weisen Wolfganng Hainpuecher, der zeitt ewr gnaden ambtman aigen aufgedruckten petschadt, doch im, sein erben und petschadt an schaden, under das petschadt ich mich obbenannte Anna fur mich und all mein erbm verpint bei meinenn trewen an aides weis alles das war und statt zu halltn in hallt des bettbrieffs. Zewgen bittens umb ewr gnaden in sigll an den kawffbrieff und umb das gegenwuertig petschadt sind dy erbern Lienhart Wielant, Veicht Katzloder, Jorg Peckh, all drey purger zu Hag und meniger genueg. Geschehen an sand Dorothee tag nach Krists gepurde viertzehenhunndertt und inn dem vierundnewnntzigisten jarn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 407f, Nr. 3335