Erwirdig in Got geistlicher und besunder lieber herre mein willig dinst sein euch zuvor. Unnsers allergenedigisten herren n. des romischen kunig vogtman Sigmund auf der Listnhueb in der vogtey Wels meiner verwesung gehorn hat mich an stat seiner konigelichn gnaden anbracht, wie er erblich gerechtikhait bey der Tantzhueb hob, euch und ewern gotzhawss Lambach zugehorig, dar zw er als vor zwaien jaren mit ainem spruch bericht und vertrag gesprochen worden sey, das er ytz darzw komen solt als er euch klarlicher berichten wurdet. Dem nach bit ich euch mit vleiss, ir wellet benantem Sigmunden der pillikait nach geholffen seinn, das er zu solhm seinem erbtail nach lawt des bemelten vertrag kome, das wil ich in solhem und mereren willig umb euch verdienen. Datum Wels eritags nach sandt Georign tag anno domini etc. lxxxxiiii.

Michel Oberhaimer||
vogt zu Wels