Maximilian von gots gnaden Romischer kunig etc.

Ersamer geistlicher lieber andechtiger. Wolfganng Ligimlannd hat unsern stathalltern und regennten zu Wienn ain suplicacion, die wir dir hierinnen verslossen zuschickhen, furbracht als du vernemen wirdest, emphelhen wir dir ernnstlich, soferr die sachen lautt yetz gemellter suplicacion gestallt sein, daz du dann bey dem Mauttferg darinnen begriffen mit ernnst darob seyest, damit er den genannten Ligimlannd umb sein zuspruch unverzogenlich benugig und unklaghafft mache, dardurch wir darumb ferrer nicht angelanngt werden, daran tust du unser ernnstliche maynung. Geben am sambstag vor sannd Michelstag anno domini etc. lxxxxiiii unserer reiche des romischen im newntten und des hungrischen im funfften jarenn.