Wolgeboren gestrenng gnadig hern. Sich hat begeben, daz mir ein geschworner nauferg hinter dem von Lambach gesessen, ein naufart mit ettlichen pfunden kueffel saltz von Stadl aus gen Twnaw wartz solt gefurt haben, wie dan gewonhait ist, aber derselb nauferg im walwasser der Traun davon gesprungen, daz schiff saltz sampt ettlichen unkundigen gesellen hat rynnen lassen, deshalb das saltz im wasser verdorben. Solichs han ich dem abt von Lambach uber sein hintersessen geclagt, aber mir kain ausrichtung beschehen. Nun mogen villeicht ewr gnaden wissen haben, daz gewonhait und alts herchomen ist, das ein yeder fertiger vom pfund kueffel in daz ampt zu Gmunden geben sol iiii tal. den., so dann das saltz im wasser schadhafft wurd, sol im die bemelt summ ain yden tal. kueffel nachgelassen werden. Solichs han ich pey Wolfgangen Oder amptman daselbs ersuecht, aber mir dar inn kain volg von im beschehen und redt sich mit dem aus, daz saltz sey verwarloset worden, doch wa ich ein geschefft mug von ewr gnaden auf in auspringen, sey er willig daz nachtzulassen, bite ich ewr gnaden mit untertenikait bey benantem versuegen mir solich gelt nachdem ich sunst schaden gnug erlitten hab, austhun und nachgelassen werd, will ich mit untertenikait um ewr gnaden verdienen.

Ewr gnaden||
unterteniger Wolfgang||
Lieg im land an der Hallstat