Dem erwierdign in Gott geistlichn herrn herrn Johanns, abbt zu Lambach, unserm genadigen herrn, enpietn ich Sibilla, Mertn zu Nidertann yecz gesessn auffn Scherhauffn hoff eliche hausfraw, ich Barbara, Wolfgangen Hinderholczer in der Schaffwisn in Welsser pharr gesessn hausfraw, paid geswistred, Hannsn des alltn Scherhauffn salign kinder, unnser willig gehorsam dinst, fuegn ewrn gnadn zu wissn, das wier Jorign in der Rewtt, unserm liebm swagern, Katrein seiner hawsfrawen unser liebm swester und irn paider erbm zu kauffn gebm habm all unser erbliche gerechtikait, so wier habm gehabt an zwain guetern in der Rewtt, das unser vatter erb gewesn, ains gelegn in Lambbekher pharr, das ander in Gunskiricher pharr und die dinstper urbar guet sein ewrn genadn gotzhaws. Genadiger herr, pittn wier ewr genad, ir wellet in die gemelt unser erbschafft und gerechtikait an den bemeltn guetern nach des wierding gotzhaus rechtn ain kauff verleihn und bestattn, gelobm wier fur uns, unser erbn mit unsern trewn furpaser in ewr gnadn vertigung nicht zu redn noch dawider zu thun in dhainerlay weis, sunder das war und statt zu halltn und undertaniklichn verdien, und schikhn ewrn gnadn zu urkund bewart mit der erbern Jorign Aschl, purger zu Wels, und Taman Puntschuech paider aign aufgedruktn petschafft, die wier mit vleis gepetn habn in und irn erbn an schadn. Gebn am freitag sand Anthoni tag anno etc. lxxxxiiii.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 406f, Nr. 3334