Alexander episcopus servus servorum dei dilecto filio .. abbati monasterii Lambacensis Pataviensis diocesis salutem et apostolicam benedictionem. Solet apostolice sedis benigna clementia recurrentium ad eam post lapsum cum humilitate personarum statui libenter consulere et ad illos graciam sue liberalitatis extendere, quos ad id alia propria virtutum merita laudabiliter recommendant. Exhibita siquidem nobis nuper pro parte dilectorum filiorum Wolfgangi Ratel et Sigismundi Wolfshutter presbyterorum Pataviensis diocesis peticio continebat, quod olim postquam dictus Wolfgangus tunc vicarius temporalis parrochialis ecclesie opidi in Grieskirchen dicte diocesis existens quondam Johannem Sporell laicum iudicem secularem lantrichter nuncupatum districtus dicti opidi tunc in humanis agentem qui pro eo quod quendam presbyterum non absque manuum iniectione in eum dei timore postposito temere violenta ausu sacrilego acriter vulneraverat, excommunicationis sententiam in tales a canone promulgatam incurrendo, eodem presbytero vulnerato instante ad divina officia in eadem ecclesia audienda inter alia admittere recusaverat, ipseque Johannes propterea cum Wolfgango et Sigismundo prefatis ac nonnullis aliis presbyteris rixosis verbis primo contenderat et deinde contra ipsos exeuntes de quadam honesta domo, in qua recreationis causa fuerant, plura iniuriosa verba protulerat, et eis inde recedentibus quidam laicus incola dicti opidi rectorem sive magistrum scolarum dicti Wolfgangi familiarem continuum commensalem eos insequentem graviter percusserat, prefatus Wolfgangus rumorem et sonitum cultelorum seu gladiorum sentiens et volens scandalis obviare rediit, et tunc dictus laicus aufugit. Postmodum vero prefatus Johannes ex insperato domum suam armatus exiens et prefatum Wolfgangum aggrediens illum manibus suis in maxilla et altera manu percussit et interea prefatus Sigismundus in defensionem dicti Wolfgangi cum uno baculo piscatoris accurrit et eidem Johanni duos ictus sine vulneratione cum predicto baculo eidem Johanni intulit ac prefatus Wolfgangus cum quodam gladio a certo familiari suo pro sua defensione accepto, eundem Johannem tribus ictibus et uno duntaxat vulnere absque tamen magna sanguinis effusione vulneravit, prefatusque magister scolarum etiam prefatum Johannem in manu dextra et aliis sui corporis partibus graviter percussit, ex quibus quidem percussionibus prefatus Johannes post aliquot dies sicut domino placuit expiravit. Cum autem sicut eadem petitio subiungebat Wolfgangus et Sigismundus prefati de morte dicti Johannis, in qua aliter, qua ut premittitur, culpabiles non fuerunt, doluerint et doleant ab intimis cupiantque pro ipsius Johannis et aliorum defunctorum animarum salute altissimum exorare pro parte Wolfgangi et Sigismundi predictorum asserentium quod ob premissa ad romanam curiam non absque magnis laboribus et expensis se personaliter contulerunt, licet postmodum propter eorum paupertatem et rerum penuriam ab ea recesserint, nobis fuit humiliter supplicatum, ut ipsos et eorum quemlibet a reatu homicidii et excessibens huiusmodi absolvere secumque super irregularitate, quam propterea contraxerunt quodque in omnibus per eos susceptis ordinibus etiam in altaris ministerio ministrare valeant, dispensare aliasque ipsis et eorum statui in premissis oportune providere de benignitate apostolica dignaremur. Nos igitur attendentes, quod prefate sedis clementia recurrentibus ad eam post excessum cum humilitate filiis sue pietatis sinum favorabiliter aperire consuevit, prefatos Wolfgangum et Sigismundum et eorum quemlibet a quibuscunque excomunicationis, suspensionis et interdicti aliisque ecclesiasticis sententiis, censuris et penis a iure vel ab homine quavis occasione vel causa latis, si quibus quamodolibet innodati existunt ad effectum presentium duntaxat consequendum harum serie absolventes et absolutos fore censentes huiusmodi supplicationibus inclinati discretioni tue per apostolica scripta comittimus et mandamus quatinus eosdem Wolfgangum et Sigismundum et eorum quenlibet, si humiliter petierunt a reatu homicidii ac excessibus huiusmodi auctoritate nostra hac vice duntaxat absolvas in forma ecclesie consueta iniunctis inde sibi pro modo culpe penitentia salutari et aliis que de iure fuerint iniungenda necnon cum ipsis et eorum quolibet super irregularitate, quam propterea contraxerunt, quodque in omnibus per eos susceptis ordinibus etiam in altaris ministerio ac quecunque quotcunque et qualiacunque beneficia ecclesiastica cum cura se invicem compatientia etiam si canonicatus et prebende dignitatis personatus administrationes vel officia in cathedralibus etiam metropolitanis vel collegiatis et dignitates ipse in cathedralibus etiam metropolitanis post pontificales maiores seu in collegiatis ecclesiis huiusmodi principales fuerint et ad dignitates personatus administrationes vel officia huiusmodi con[...]uer[...]nt, qui per electionem assumi eisque cura immineat animarum, si sibi alias canonice conferantur aut elegantur, presentatur vel alias assumantur ad illa et instituantur in eis recipere et retinere illaque omnia et singula simul vel successive simpliciter vel ex causa permutationis quotiens ipsis placuerit dimittere et loco dimissi vel dimissorum aliud vel alia simile vel dissimile aut similia vel dissimilia beneficium seu beneficia ecclesiasticum vel ecclesiastica etiam quecunque quotcunque et qualiacunque se invicem ut prefertur compatiencia similiter recipere et detinere libere et licite valeant eadem auctoritate dispenses aboleasque omnem inhabilitatis et infamie maculam sive notam per eos et eorum quenlibet premissorum occasione contractam, non obstantibus premissis ac constitutionibus et ordinationibus apostolicis nec non statutis et consuetudinibus ecclesiarum, in quibus beneficia huiusmodi forsan fuerint iuramento confirmatione apostolica vel quavis firmitate alia roboratis ceterisque contrariis quibuscunque. Datum Rome apud sanctum Petrum anno incarationis dominice millesimo quadringentesimo nonagesimo quarto sexto idus maii, pontificatus nostri anno secundo.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 424-427, Nr. 3350