Dem erwirdigen und geistlichen herren, herren Johannsn abtt zw Lambach, unserm genedigen herren, enpieten wir ich Wolfgang, ich Niclas, ich Wolfgang, ich Syman fur uns selber und nemen uns auch an fur unsere geswistret Lienharten, Joring, Babara, Katrein, Sigmunden, Barbara, alle geswistret des Thoman zu Grueb saling kinder, und ich Wolfgang, ich Hanns, ich Mert, ich Anna des Joring Hamstuckch saling kinder, und ich Linhart, ich Veyt geswistret des Sigmunden an der Prukch saling kinder und wir alle sechsew Kunczen Hamstukch und Margreten seiner hawsfrawn saling enengkel unser willig dinst zuvor. Genadiger herr, es kumbt zw ewern genaden unser lieber prueder und veter Thoman, des Taman sun zw Grueb saling und wirt ann ewr genad pegern ains verczeich brief umb all unser eribschaft und gerechtigkait, so wir gehabt haben an dem guet zw Grueb in Lochkrircher pharr, also pit wir ewr genad mit allem vleys, ewr genad well den verczeich brief mit ewren genaden anhangunden insigln bestatn und vertign, und wann ir das also getun habt, so geloben wir ewern genaden mit oben bestimbten namen in ewr genaden in sigill nicht zw reden in kainerlay weys an aides stat ungevarlichen. Und des zw urkundt geben wir ewch den offenn petbrief verpetschaft mit der Linharten Zangkel zw Lochkirchen und Syman Vorhar in der Strass paider aufgedrukchten petschaft, dew wir obgenant eribn mit vleyss darumben gepeten haben, doch in paiden und allen irn eriben an schaden. Zeuge der gepet umb die petschaft Ulreich zw Perkchaim auch umb das insigl Linhart Schuester zw Lochkirchen, Michel Web zw Maczntal und ander frumer lewt mer. Geben am montag vor Thoman anno domini lxxxxiiii.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 449f, Nr. 3370