Ich Hanns Muldorffer, ich Hanns Schreckhinger, ich Hanns Ardinger und ich Lienhart Kapfer, all vier burger zu Haslach, bekennen fur unns, all unnser erben und thun kund offenlich mit dem brief allen den er furkumbt, daz wir samentlich mit wolbedachtem mut und gutem willen recht und redlich verkawft und kewflich ze kawffen geben haben dem erwirdigen in Got geistlichen unnserm genedigen und lieben herren herrn Johannsen abbt zu Lambach seiner genaden nachkomen und convent daselbs die behawsung, hofmarch und hofstat zu Lambach im marckht zenachst oben an des Newbirts tafern und gasthaus gelegen mit aller irer rechtlichen zugehorung, so von allter dartzu gehort hat, das dann Hannsen Hinterpekhen, burger daselbs zu Lambach gewesen und ist unns von demselben umb ain summa gellts nach innhaltt aines schuld und satzbriefs verschriben zu verkawffen erlawbt und darauf mit gerichtshannden eingeantwurt worden, derselben summa gellts unns der benant unnser genediger herr von Lambach auf gerechtikait und brieflich urkund damit dy behawsung vorhin alltens seinen genaden und dem wirdigen gotshaws verphlicht und verschriben gewesen ist zu rechten tagen on allen unnsern schaden ganntz und gar ausgericht und betzalt hat. Auff solhes haben wir all vier obbenant burger zu Haslach demselben unnserm genedigen herren dem abbt seiner genaden nachkomen und convent in ir gewalt nutz und gewer dy berurt behawsung, hofstat und hofmarch mit irer zugehorung und mitsambt dem obbestymbten schuld und satzbriefs unnser gerechtikait aus unnser aller unnser erben gewalt, nutz und gewer rechts kawfsweis ubergeantwurt mit statter ewiger vertzicht fur unns und all unnser erben hiemit wissenlich in kraft des briefs. Der benant unnser genediger herr von Lambach seiner genaden nachkomen und convent sollen und mugen auch nwn furann mit der bestymbten behawsung hofstat und hofmarch und irer zugehorung handeln und thun nach irem fug und guten willen alls mit annderm irem freyen gut on unnser unnserer erben und menigklichs von unnsern wegen irrung und hindernuss ongevar. Wir obgenant Hanns Muldorffer, Hanns Schrekhinger, Hanns Ardinger und Lienhart Kapser und all unnser erben unverschaidenlich sein auch der vorbestymbten behawsung hofmarch, hofstat und irer zugehorung des benanten unnsers genedigen herrn des abbts seiner gnadn nachkomen und convent recht gwern und furstand fur all rechtlich ansprach, wo und wann in des not und durft beschicht mit dem rechten alls dann sollichs kawfs und lanndes ob der Enns recht ist ongevar. Gieng in aber an dem kawf und gewerschaft ichts ab oder daz in krieg oder ansprach darumb auferstuend, des sy mit recht zu schaden kamen, das sollen und wellen wir in alles ausrichten betzallen und widerkeren, sy sollen oder mugen auch alles haben suchen und bekomen bey uns allen unnsern erben und trewen dartzu unverschaidenlich auf allen unnserm gut anliggunden und varundem, wo wir daz inndert haben, gewingen und hinder unns lassen nyndert noch nichts davon ausgenomen noch hindangesetzt alles trewlich und ungevarlich. Zu urkund geben wir des allso den offenn brief besiglten mit der edlen und vessten Cristoffen Oberhaymer zu Irnhartting, Erharten Utzinger zu Wildenhag und Mertten Oberhaymer zu Prayttennaw aller dreyer anhangunden insigeln, die wir all obbenant mit vleis darumb gebeten haben, in und iren erben an schaden. Geben alls man zallt nach Cristi geburd viertzehenhundert und im funfundnewntzigisten jaren an montag der heiligen unschuldigen kindlein tag.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 450f, Nr. 3371