Ich Mertt Peckh zu Lambach bey dem Liechtensteg unnter der pfarr gesessen, ich Margreth sein hawsfraw und ich Liendl sein sun bekennen fur unns, all unnser erben und thun kund offenlich mit dem brief allen den er furkumbt, daz wir mit wolbedachtem mut und gutem willen recht und redlichen verkawft und ze kawffen geben haben dem erwirdigen in Got geistlichen herren herrn Johannsen abbt zu Lambach, seiner genaden convent und nachkomen unnser haws, hofstat und hofmarch mit iren rechtlichen zugehorungen gelegen zu Lambach unnter der pharr kirchen bey dem Liechtensteg ze nachst des Utzinger wisen daselbs umb ain summa gellts, der wir von in gantz und gar ausgericht und betzalt worden seinn zu rechten tagen on allen schaden. Auff sollichs haben wir dem genanten unnserm genedigen herren, seiner genaden convent und nachkomen dyselb unnser behawsung, hofstat und hofmarich mit iren zugehorungen aus unnser erben gwallt, nutz und gewer ubergeantwurt. Unns der ganntz und gar zu steter vertzicht vertzigen hiemit wissentlich in kraft des briefs darauf und darnach nicht mer ze sprechen weder mit noch an recht geistlich noch weltlich in kainerlay weg noch weis. Der bemelt unnser genediger herr, seiner genaden conent und nachkomen sollen und mugen auch damit gehandln, versetzen, verkawffen, geben lassen wem und wie sy wellen nach allem irem fug und guten willen an unnser, unnser erben und menigklichs von unnsern wegen irrung und hindernuss ongevar. Wir und unnser erben seinn auch des berurten hawss, hofstat und hofmarch mit iren zugehorungen des benanten unnsers genedigen herren von Lambach, seiner genaden convent und nachkomen recht, gwern und furstand fur all rechtlich ansprach wo und wann in des mit recht, not und durft beschicht alls dann sollichs kawfs und lanndes ob der Enns recht ist ongevar. Gieng in aber an dem kawf und gewerschaft icht ab oder das in krieg oder ansprach darumb auferstuend von wem daz war, des sy mit recht zu schaden kamen, daz sollen und wellen wir in alles richtig machen betzalen ausrichten und widerkeren. Sy sollen auch daz allen haben, suchen und bekomen bey unns allen unnsern erben und trewen dartzu unverschaidenlich auf allem unnserm gut anliggundem und varundem, wo wir daz inndert haben gewingen und hinder unns lassen alles trewlich und ungevarlich. Mit urkund des briefs besigelten mit der edln vessten Cristoffen Oberhaymer zu Irnharting und Erharten Utzinger zu Wildenhag paider anhangunden insigeln, die wir mit vleis darumb gebeten haben, in und iren erben on schaden, darunter wir unns mit unnsern trewen aides weis fur unns und all unnser erben verpinden stet ze hallten, so an dem brief geschriben steet, der geben ist alls man zalt nach Cristi geburd viertzehenhundert und im funfundnewntzigisten jaren an montag nach dem heiligen palmtag in der vassten.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 462f, Nr. 3380