Dem erwirdigen in got geistlichen herren herren Johannsen abbt zu Lambach unserem gnadigen herren empieten ich Hanns, ich Thoman, ich Dorothee, ich Margret und ich Elspet alle funffe geswistret weilendt Wolfgangens Mulner im Rinderperg in Lensteiner pharr saligen eeliche kinder unser gehorsam willig dinst bevor. Gnadiger herr, wir fugen ewern gnaden ze wissen, das unser lieber swager Wolfgang Gretzmulner in Kirchdorffer pharr sich mit uns freundllich gericht hat umb alle erbschaft anligundts und varundts guts, so wir und unser lieb veternn und muemen Wolfgang, Warbara und Margret, unsers bruder Andree saligen kinder, dofur wir uns annemen dann sew unvogtper sein, bey im und auf allem seinem gut anligundten und varundten nindert noch nichts darinn ausgetzogen gehabt haben oder gehaben hieten mugen, uns anerstorben von unserem lieben vetern Wolfgangen sein und seiner ersten hausfraun Kathrein unser swester saligen sun. Und bitten eur gnad mit allem vleis, wellet im und sein erbem daruber ainen vertzeichbrief verfertigen mit eurem anhanngundten insigl. Geloben darauf euren gnaden bey unseren treun an aides stat also das weder wir vorbenanntte alle noch unser erbem noch ymandt annder von unsernn wegen in eur gnaden insigel nichts einreden noch widersprechen sullen, wellen noch mugen in kaynerlay weise an gever. Des ze urkundt geben wir euren gnaden den petbrief verpetschadt mit der erberen Conraden Sprengseisen, Urban Weber und Johannesen Sigenhauser all drey burger zu Kirchdorf. aufgedrukhten petschadten, die wir mit vleis darumb gepeten haben, doch in und iren erbem an schaden, der geben ist an freitag sandt Allexen tag nach Cristi gepurd viertzehen hunndert und im funfundneuntzigisten jare.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 470f, Nr. 3386