Maximilian von Gots gnaden Romischer kunig etc.

Ersamer geistlicher lieber andechtiger. Wir seinn ungezweifellt dir sey nicht verborgen was beswerung der durleuchtigist furst herr Karll kunig zu Frannkhreich durch den eintzug die verganngen zeit in die Welhischen lannde getan dem heiligen vater dem babst der romischen kirchen den fursten und comuniteten derselben lannde zugefugt, deshalben sy unns als ainen vogt und beschirmer derselben umb hilf ersucht den wir die mitzuteilen willig und schuldig seien und haben darumb mit rate unnser und heiligen romischen reichs churfursten und anndern unndertanen yetze zu Worms furgenomen unns daselbshin in Welhische lannde mit heres krafft ze fugen dem gemelten kunig von Frannkhreich widerstanndt zu tun in hofnung mit verleihung der gnaden gottes den gemelten heiligen vater babst die romisch kirchen die vorberurten fursten und comunitet von solhem lasst zuenntheben auch die Tewtschen nation so dann derselb kunig von Frannkhreich villeicht begirig werr der wirden und ere des heiligen romischen reichs zu enntsetzen vor seinem furnemen zu verhuetten dartzue unns die yetzbestimbten churfursten und fursten enntlich hilf und beystanndt tun und wiewol dieselb hilf vasst treflich und tapfer sein wirdet dardurch du doch selbs daz dannach dits unnser furnemen unnserer person halben nicht wenig kossten noch aines klainen darlegen bedurffen wirdet dadurch wir zu solhem zug ainer merkhlichen summa gellts der wir von unnsern ordennlichen nutzen und rennten alsbald nicht aufbringen noch haben mugen ditsmals notturfftig seinn und darumb auf all unnser preleten allenthalben wir unsern erblichen furstentumben ain anlehen und nemlich auf dich und dein gotshaws sechshundert phundt pheninng zu diser unnser notturfft geslagen und begern darauf an dich mit sonnderm vleis und ernnst bevelhennd, daz du unnserm getrewn lieben Symon von Hungerspach unnserm rate und schatzmaister general oder wen er von seinen wegen dartzu ordnen wirdet die berurten zway hundert phundt phenning zu unnsern hannden leihest und demselben die auf der gemelten unnsers schatzmaisters quittung zwischen hie und sannd Michelstag nagstkunfftig on ferrer vertziehen raichest und anntwurttest und nachdem das unnserer merkhlichen anligenden not und obertzellten ursachen halben kain lennger bit oder waigrung erleiden mag und unns des zu dir genntzlich verlassen dich hierinnen gehorsamlich halltest, wo du aber dits unnser begern verachten und die offtgemellt summa anlehenns in der obbestimbten zeit nicht entrichten noch unnser notturfft darinnen ansehen wirdest, haben wir nemlich bevolhen dich und die deinen mit aufhaltung, phanndtung und in annder wege mit ernnst zu solher betzallung zu bringen, darumb ertzaig dich hierinnen dermassen als du dann der heiligen cristennlichen kirchen der Tewtschen nation sunderbar unns als deinem naturlichen herren und lanndsfursten schuldig bist, daran tuest du genntzlich unnser ernnstliche maynung und wir wellen das kunfftiklich gegen dir und deinen gotshaws in allen gnaden verkennen. Geben zu Worms an sambstag sannd Ulrichs tag anno domini lxxxxv^to unnserer reiche des Romischen im zehennten und des Hungrischen im sechsten jarenn.