Dem erwirdigen in gott und geistlichen herrn her Johannsen abbte zu Lambach unnserm genadign gunstigen lieben herrn enpewt ich Wolfgang Dietenshaimer purger im Newnmarkt und ich Elspett sein eeliche hawsfraw unnser gehorsam willig unndertanig dinst zuvor. Wir fuegen ewren genaden zu wissen, das wir ain Ortt an dem Holtz auf der Hochrewtt ze nagst an dye Helmlinger pewtt gelegen, wie es yetzund mit grabm und marchen ungeverlich umbfangen ist, in Tawfkircher pharr gelegen in Edlinger gericht, datz dan ewrer gnadn gotshaws Lambach dinstpars urbar ist, zu statem ewigen kawff kewfflich zu kawffen geben habm dem beschaiden Hannsen zu Helmling und Margrethen, Ursula, Micheln und Anna des yetzbemelten Hannsen zu Helmling leibliche geswistratt und alln irn erbm umb ain summa gelts, der wir von in schon betzalt und entricht sein nach unnserm wolgefallen, als ewr genad das an dem kawfbrief hinfur mitmer wortn vernemen werdet. Auch sullen sew euch und ewrer genaden gotshaws alle jar jarlich davon dien, gebm und raichen zu der dinstzeit zwaitzigkh pfennig lanndtgabiger munss im landt ob der Enns. Darauf bitten wir ewr gnad mit allem sunderm vleis, welle demselben Hannsen zu Helmling und allen seinen bemeltn geswistraten und allen irn erbm ain genuegsamen landtlewffigen kawfbrief daruber verfertigen, und wan ewr gnad das gethan hat, so geloben und versprechn wir ewren genaden fur uns all unser erbm ewr genaden verfertigung, brief und in sigl nicht zu reden vil noch wenig, sunder mit unsern willigen dinstn umb ewr gnad verdienen. Und des zu warm und statm urkund schicken wir euch den offen betbrieff, verfertigt durch unnser vleissigen gepet willn mit des erbernn weisen Wolfgang Hainpuecher, an den zeitn ewrer gnadn ambtman aufgedruckten petschadt, doch im, sein erbm an schaden, unnder das petschadt wir unns obgemelt verpintn bei unnsern trewen an aides weis alles das war und stat zu haltn, das an dem petbrief geschriben sett. Zewgen bittens umb ewr gnaden insigl an dem kawfbrief und umb das gegenwurtig petschadt sind dy erbern Veicht Scherar, Jorg Vaschang bed zu Gaspoltshoven, Hanns Sneider zu Petenhaim und mer frumer lewt genueg. Geschehen an freitag vor reminiscere in der vasten nach Christi gepurde viertzehenhunndertt und in dem sechsundnewntzigistn jarn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 478-480, Nr. 3396