Dem erwirdigen geistlichen unnserm genedigen und lieben herrn herren Johannsen abbt zu Lambach embieten ich Lienhart Vierlinger schuster zu Krembssmunster und ich Elsbeth sein hawsfraw unnser gehorsam willig dinst bevor und fuegen ewren genaden ze wissen, daz wir unns gantz und gar veraint und vertragen haben mit unnserm lieben stewfsweher und stewffater maister Wolfgangen Puhler stainmetzen und burger zu Lambach von wegen alles meiner benanten Elsbethen veterlich und muterlichen erbs anliggunden und varunden guts, so ich bey im gehabt und ze haben vermaint, darumb und dafur er unns baiden benanten kanlewten ain ganntz volligs benugen gethan hat, des wir von im ausgericht und betzalt sein zu rechten tegen on allen schaden. Darauf bitten wir ewr genad in diemutigen vleis, wellet demselben maister Wolfgangen Pichler und allen seinen erben genugsam vertzeichbrief zu steter ewiger furtzicht fur unns und all unnser erben lawttund mit ewer genaden insigl nach gewonhait ewer genaden gotshawss verfertigt geben. Daz beschehen geloben und versprechen wir hiemit in kraft des petbrief in und wider solh ewer genaden brief und sigl nit ze reden in kainer weis, sonnder alles so derselb vertzeich brief und der petbrief ausweisen stat halltund mit unnsern willigen dinsten zu verdienen. Mit urkund des petbrief, den wir ewren genaden darumben sennden durch unnser vleissigen pet willen unnter der erbern weisen Hannsen Syppetzeller zu Krembsmunster und Jorgen Reichhuber baider aufgedruckhten petschaden, in und iren erben an schaden, des seinn zewgen dy erberen Ambrosi Wirt im Pawngarten und Wolfgang Schuster, bed burger zu Krembsmunster. Geben an montag vor unnser lieben frawntag irer gepurd anno domini etc. lxxxxvi^to

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 494f, Nr. 3410