Venerabilibus ac religiosis in Christo patribus et fratribus domino Johanni abbati, Pangracio priori totique conventui monasterii beate virginis Marie et sancti Kiliani episcopi et martiris in Lambaco Pataviensis dyocesis ordinis sancti Benedicti. Nos fratres Georius, abbas Michael prior totusque conventus monasterii beati Georgii martiris in Prufennig ordinis eiusdem Ratisponensis dyocesis cum sincere caritatis affectum salutem in domino perhenniter adipisci. Quia mediante caritate que vinculum perfeccionis ab apostolo predicatur membra singula in corpore sancte ecclesie sibi invicem coniunguntur et Christo suo capiti ad percipiendam per ipsum et in ipso graciarum spiritualium influenciam uniuntur tanto liberius atque libencius sinum caritatis in ampliande confraternitatis consorcium dilatamus quanto ad participacionem fructus huiusmodi fervencius anhelamus, unde vestrarum caritatum devotis precibus ac famosa religiositate permoti matura deliberacione prehabita plene confraternitatis consorcium omnium silicet bonorum participacionem in missis, oracionibis, elemosinis, abstinenciis et vigiliis ac aliis virtutum exerciciis, que divina clemencia per presentes nos et successores nostros in dicto nostro monasterio Prufeningen dignabitur operari vobis ac successorilus vestris tenore presencium in vita pariter et in morte libere concedimus adicientes nichilominus quod cum obitus fratris unius aut plurium predicti monasterii vestri professi vel professorum nobis intimatus fuerit, vigilias et missam defunctorum iuxta consuetudinem nostri monasterii persolvemus, sed et singuli sacerdotes missas legentes singulas missas, clerici vero missas non legentes officium defunctorum totum vesperas scilicet vigilias novem leccionum cum laudibus, conversi quoque singuli centum pater noster cum tottidem ave Maria in remedium animarum eorundem dicent sed nomina ipsorum defunctorum nostro mortuologio annotabuntur singulis annis in nostro capitulo recitanda pro quibus eciam solita oracio fiet. In quorum omnium testimonium et robur hanc paginam nostram sigillis nostris munitam vobis prefatis confratribus nostris tradere decrevimus. Datum in nostro monasterio Prufeningii in crastino assumpcionis beate Marie virginis anno domini et millesimo quadringentesimo nonagesimo sexto.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 492f, Nr. 3409