Nicolaus dei et apostolice sedis gratia episcopus Ypponensis, reverendissimi in Christo patris et domini domini Cristofferi eadem gratia episcopi Pataviensis in pontificalibus cooperator universis et singulis christifidelibus presentes nostras literas inspecturis salutem in domino sempiternam. Splendor paterne glorie, qui sua mundum illuminat in effabili claritate pia vota fidelium de ipsius clementissime maiestate sperancium, tunc precipue benigno favore prosequitur cum devota ipsorum humilitas sanctorum precibus et meritis adiuvatur. Cupientes igitur ut ecclesia beate virginis Marie et sancti Kyliani episcopi et martiris patronorum monasterii Lambacensis Pataviensis diocesis congruis frequentetur honoribus fidelesque ipsi eo libencius devocionis causa confluant ad eandem quo ibidem celestis dono gracie uberius se noverint esse refectos et a christifidelibus iugiter veneretur, de omnipotentis dei misericordia ac beatorum Petri et Pauli apostolorum auctoritate confisi omnibus et singulis vere penitentibus et confessis, qui dictam ecclesiam monasterii Lambacensis in die nativitatis, circumcisionis, epiphanie, cene domini, parasceves, resurreccionis, ascensionis domini nostri Jesu Christi, penthecostes, trinitatis et corporis Christi, singulis diebus festivitatum gloriose virginis Marie, omnium sanctorum, omnium apostolorum necnon ipsius ecclesie patronorum et dedicacionis festivitatibus devote visitaverint et ad reparacionem, conservacionem ipsius ecclesie edificiorum, calicum, librorum ac aliorum omnium ornamentorum pro divino cultu necessariorum quocienscumque porrexerint manus adiutrices, nos episcopus prefatus pro qualibet ipsarum festivitatum et celebritate huiusmodi quadraginta dies criminalium et octoginta venialium peccatorum de iniunctis eis penitenciis misericorditer in domino relaxamus perpetuis futuris temporibus duraturis. In quorum omnium fidem presentes nostras literas fieri nostrique maioris sigilli iussimus et fecimus appensione muniri. Datum in monasterio Lambacensi die septima mensis iunii anno domini milesimo quadringentesimo nonagesimo sexto.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 484f, Nr. 3402