Dem erwirdign geistlichn herrn herrn Johannsn abbt zu Lambach unnserm genedigen herrn embieten ich Leonhardus ain schueler weilennt des Martin Sneider am Puchl daselbs zu Lambach gesessen saling sun, und ich Barbara sein swester des erbern Sigmunden Fuertner burger zu Enns hausfraw, unnsern dienst in guetn willen zuvor. Ewrn gnaden fuegn wir zu wissen, das wir unnserm liebn swager Wolfganngen Mawrer, Margrethen seiner hausfrawen unnser liebn swester und iren baiden erben ze kauffen geben haben ain jewch akcher im Mitterfeld gelegen halbs, item im Swaichfeld ain viertayl ains jewch akcher und daselbs im Swaichfeld ain halbs jewch akcher gelegen, so im zu seiner hausfrawen der bemelten unnser swester zu heyrat geben ist worden, ewr gnad mit dienmuttigen vleiss bittund, welle den bemelten unnserm liebn swager Wolfganngen Mawrer, Margrethen seiner hausfrawen unnser liebn swester und iren baiden erben nach ewrn gnaden gotzhawss gewonhait ain khauffbrief darumben vertigen und bestatten, wellen wir umb ewr gnad altzeit willig und gern verdienen. Und so ewr gnad das also gethan habet, geloben und versprechen wir ewern gnaden mit unnsern trewn und aydn wissentlich mit dem brief, das wir noch all unnser erben nun hinfur in ewern gnaden innsigill bestatt und vertigung nichts reden noch sprechen sullen noch wellen, weder mit recht noch an recht, alles trewlich und ungeverlich. Mit urkundt des brieffs pewart und betzewgt durich unnser vleissigen bete willen mit der erbern weisen Sigmunden Furtner unnser liebn swager und kanman burger zu Enns und Gregorien Kirichaymer statschreiber und burger daselbs baider aufgedrukten petschadten, doch in und iren erben an allen schaden. Geben zu Enns an eritag vor sannd Achatzn tag anno domini M^o cccc^o lxxxxvi^o

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 488f, Nr. 3405