Dem erwirdigen in gott geistlichen herrn her Johannsen abbte zw Lambach unnserm genadign liebn herrn enpewten wir ich Hanns Awer, ich Wolfgang Rawmensatl zu Aystershaim geprueder und ich Anna des Jorgn Prehafn zw Portz in Weiberner pharr gesessen eeliche hawsfraw unnser gehorsam willig undertanig dinst bevor. Wir fuegen ewren genaden zw wissen, das wir all unnser erbschafft und gerechtikait, so wir ungeverlich gehabt haben an dem guettlein zu Puesing mit aller zugehorung in Gebaltzkircher phar gelegen in Starhemberger gericht, das dan dinstpars urbar ist euch und ewrer genaden gotshaws Lambach zu einem ewigen staten kawff verkawfft habm dem beschaiden Asm Mayr zu Puesing, Elspechten seiner eelichen hawsfrawn und allen irn baider erbm, dy sew habm oder noch gewingen umb ain summa gelts, der sew unns zu rechten tagen schon betzalt und ausgericht haben nach unnserm wolgefallen, als ewr gnad das an dem kawffbrieff hinfur mit mer worten vernemen werde. Darauff bitten wir ewr gnad mit allem diemutigem sondern vleis, welle demselben Asm Mayr zu Puesing, seiner hawsfrawn Elspechten und allen irn baider erbm ain genuegsamen lanndtlewffigen khawffbrieff daruber verfertigen. Und wan ewr genad das also gethan hat, so geloben und versprechen wir ewren gnaden fur unns all unserer erbm und manigklichs von unnsern wegen in ewr genaden verfertigung brieff und insigell nicht zu reden vil noch wenig, sunder mit unnsern willign diemutigen dinstn umb ewr genad verdienen. Und des zu warm urkund schicken wir ewren genaden den offen bettbrieff verfertigt durch unnser vleissigen gepet willen mit der erbern weisen Wolfganng Hainpuecher an den zeitn ewrer genaden ambtman und Hannsn Stegmayr zu Kirchdorff baider aufgedruckten petschadt doch in, irn erbm an schadn und unengolten ewerer gnaden vordrungn und rechtn in allen sachn, unnder dy zway petschadt wir unns obgemelt verpintn fur unns all unser erbn bei unnsern trewen an aides weis alles das war und stat zu haltn in halt des bettbriefs. Zewgen bittens umb ewr genaden in sigell und umb dy gegenwurtigen zway petschadt sind dy erbern Wolfgang Sickhinger, Lienhart Hinderholtzer und Jorg Vaschanng zu Gaspoltshoven. Geschehen an sambstag vor Johannis und Pauli der wetterherrn nach Christi geburde viertzehenhundert und in dem sechs und newnntzigsten jarnn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 489f, Nr. 3406