Dem erwirdigen geistlichn unnserem gnedigen und lieben herren hern Johannsen abbt zu Lambach empieten wir ich Steffan Waldner zu Haytnhaim und ich Thaman Oder in Talhaimer pharr gebruder unnser gehorsam willig dinst und fugen ewren genaden ze wissen, daz wir unnser und unnserer swester Margrethen seligen kinder mit namen Pawlsen und Anna, dy noch nit vogtper sein, dafur wir unns gewalt annemen erbschaft und gerechtikait, des ist geleich drew viertail an und auf ainem funftail in dem gutlen zu Puesing und seiner zugehorung in Geboltzkircher pharr erbrecht von ewren genaden und ewren genaden gotshaws, verkawft und ze kawffen geben haben Asem Mair zu Puesing, Elsbethen seiner hawsfrawen und iren paiden erben umb ain summa gellts, der wir von in ausgericht und betzalt worden seinn zu rechten tagen on allen schaden. Hierauf bitten wir ewr genad mit diemutigem vleis, wellet demselben Asmen Mair, seiner hawsfrawen und iren paiden erben uber solh obberurt unnser erbschaft und gerechtikait nach gewonhait ewer genaden gotshaws genugsam brief und sigl verfertigt geben. Daz beschehen geloben wir ewren genaden in sollich ewer genaden brief und sigl nit ze reden noch dawider ze tun in kainer weis. Mit urkund des petbrief den wir ewren genaden darumben sennden verfertigt durch unnser vleissiger pet willen mit des erberen Wolfgangen Hainpucher dietzeit ewer genaden ambtman zu Gaspoltzhoven aufgedruckhten petschad, im und seinen erben on schaden, des sein zewgen dy erbernn Hanns Stegmair zu Kirchdorff, Jorg Prehafen ze Portz, Hanns Awer und annder meniger. Geben an erichtag vor sand Peter und sand Pawlstag der heiligen zwelfboten anno domini etc. lxxxxvi^to.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 490f, Nr. 3407