Wir Johanns von gots gnaden abbt zu Lambach bekennen mit dem brief, daz fur unns komen ist Niclas Sleyher zu Wells an stat sein und seiner hawsfrawen Anna, dafur er sich gewalt angenomen, und hat mit wolbedachtem mut und gutem willen recht und redlich verkawft dy pewnten unnter dem Wagrain gelegen zwischen Hannsen Wegers grundten in Wellser pharr erbrecht von unns und unnserm gotshaws geleich halbe mit irer rechtlichen zugehorung und hat die ze kawffen geben Kristan dem Froschl zu Pach, Magdalena seiner hawsfrawen und iren paiden erben umb ain summa gellts, der sy von in ganntz und gar ausgericht und betzalt worden sein zu rechten tegen on allen schaden. Auf sollichs pat unns der obbenant Niclas Sleyher an stat sein und seiner hawsfrawen mit diemutigem vleis, daz wir dy obberurt pewnten geleich halbe mit irer zugehorung dem genanten Kristan Froschl, Magdalena seiner hawsfrawen und iren paiden erben genedigklichen geruchten zu bestatten und zu verleihen, daz wir dann allso hiemit wissenlich in kraft des briefs getan haben, was wir in rechtlichen daran bestetten und verleihen sollen oder mugen, doch das man unns und unnserm gotshaws alle jar jerlichen davon raichen und dienen soll zu unnser lieben frawentag der dinstzeit funf Wienner phenning. Es ist auch der benant Niclas Sleyher fur sich, seinn hawsfrawen und irer paider erben der berurten pewnten halber und irer zugehorung des gemellten Kristan Froschl, seiner hawsfrawen Magdalen und irer paider erben recht gewern und furstand fur all rechtlich ansprach, wo und wann in des not und durft beschicht mit dem rechten allsdann sollichs kawfs und lanndes ob der Enns recht ist angevar. Wir offnen auch das sy kainerlay wanndlung damit nit haben sollen in kainerlay weis on unnser hanndt und guten willen und sollen unns auch alles das davon leiden und dulden, daz annder unnsers gotshaws erblen gen unns leiden und dulden unvertzigen unnsers gotshaws rechten in allen sachen. Zu urkund geben wir in des allso den offenn brief, besiglten mit unnserm anhangunden insigel, der geben ist alls man zallt nach Cristi geburde viertzehenhundert und im sechsundnewntzigisten jaren an montag vor sandt Thomas tag des heiligen zwelfboten.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 502f, Nr. 3417