Dem erwirdign in gott unnd geystlichenn herrn herr Johannsen abbte zu Lambach unnserm gnadigen liebn herrn enpewtten wir ich Marx zu Hinderswent, ich Magdalen sein eeliche hawsfraw, ich Wolfgang Enngel zu Swennt und ich Agata sein hawsfraw unnser gehorsam willig undertanig dinste bevor. Wir fuegen ewren genaden all unverschidenlich zu wissen, das wir all unnser erbschaft und gerechtikait, so wir gehabt habm an dem Enngelguett zu Hinderswent mit aller zugehorung in Geboltzkircher phar gelegen in Starhenberger gericht, das dan dinstpars urbar ist ewrer gnaden gotshaws Lambach, zu statem ewigen kawff verkawft habm unserm vettern und ayden Lienhardten zu Adlpoting, Anna seiner hawsfrawn und allen iren baiden erbm dy sew habm oder noch gewinnen umb ain summa gelts, der wir von in schon entricht sein nach unnserm wolgefallen als ewr gnad an dem kawfbrief hinfur mitmer wortn vernemen werdet. Darauf bitten wir all ainhelligklich ewr gnad mit allem sunderm vleis welle demselben unnserm vettern und aydn Lienharten zu Adlpoting, Anna seiner hawsfrawn und allen iren baiden erbm ain genuegsamen landtlewffigen kawffbrieff daruber verfertigen. Und wan ewr gnad das also getan hat, so globen und versprechen wir all ainhelliklich ewren gnaden fur unns, all unnser erbem, in ewr genaden verfertigung, brief und insigl nicht zu reden vill noch wenig in dhainerlay weis angevor, sunder mit unnsern willigen dinsten umb ewr genad diemutigklich verdienen. Und des zu warm urkund schicken wir ewren genaden den offenn betbrief, verfertigt durch unnser vleissigen gepett willen mit der erbern weisen Wolfganng Hainpuecher an den zeiten ewrer genaden ambtman und Hanns Stegmayr zu Kirchdorff baider zu rugk aufgedruckten petschadt, doch in, irn erbm an schadn, under dy zway petschadt wir unns all obgemelt fur unns all unnser erbm verpintn bei unseren trewen an aides weis alles das war und stat zu halltn inhallt des betbriefs. Zewgen der gepet umb ewr genaden insigl an den kawfbrief und umb dy gegenwurtigen zway petschadt sind dy erbern Lienhart Starl wirt in der Grebmyng, Lienhart Sneider zu Gebalczkirchen, Hanns zu Adlpoting, Lienhart Hinderholtzer und mer frumer lewt genueg. Geschehen an sambstag vor sand Anthonitag nach Christi geburde viertzehenhunndert und in dem subenundnewntzigisten jarn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 502f, Nr. 3418