Dem erwirdigen in gott und geistlichen herrn hern Johannsen abbte zu Lambach meinem genadigen herrn enpewtt ich Katherina des Lienharten Scheffman zu Herrnschutzing eeliche hawsfraw mein gehorsam willig undertanig dinst zu voran. Ich fueg ewren genaden zu wissen, das ich ain viertaill aus ainem funfftail, so ich gehabt hab an dem Walner guet zu Puesing mit aller zugehorung in Geboltskircher pfarr gelegen in Starhenberger gericht, das dan dinstpars urbar ist ewer gnaden gotshaws Lambach, zu statem ewigen kawff verkawft hab der beschaiden frawn Elspechten des Asm Zwickl zu Puesing saligen verlassne witib und allen iren erbm umb ain summa gelts, der sew mich zu rechten tagen schon betzallt und ausgericht hat nach meinem wolgefallen, als ewr gnad das an dem kawfbrieff hinfur mitmer worten vernemen werdet. Darauf pitt ich ewr gnad mit allem sunderm vleis, wellet derselben obbenanten Elspechten und allen iren erbm ain genuegsamen lanndtlewffigen kauffbrieff daruber verfertigen. Und wan ewr genad das also getan hat, so gelob und versprich ich ewren gnaden fur mich, all mein erbm und manigklichs von meinen wegen in ewr genaden verfertigung brief und insigl nicht zu reden vil noch wenig, sunder mit meinen willigen dinsten umb ewr genad verdienen. Und des zw warm urkhundt schick ich euch den offen bettbrieff verfertigt durch meiner vleissigen gepet willen mit des erbern weisen Wolfgang Hainpuecher an den zeiten ewrer genaden ambtman aigen zurugk aufgedruckten petschadt, doch im, sein erbm an schaden, under das petschadt ich mich obbenante Katherina fur mich all mein erbm verpint bei meinen trewen an aidesweis alles das war und stat zu halten in halt des bettbriefs. Zewgen der gepett umb ewr genaden insigl an den kauffbrief und umb das gegenwurtig petschadt sind dy erbernn Niclas zu Erphenhoven, Lienhart Sneider zu Gebaltzkirchen, Mertan zu Grinttlach und mer frumer lewtt genueg. Geschehen an montag vor sand Kathreytag nach Christi geburde viertzehenhunndert und in dem sechsundnewnntzigisten jarn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 497f, Nr. 3413