Dem hochwirdigen herrn hernn Johannsen von gots gnaden abt zu Lambach meinem genedigen herrn embewt ich Margret, Steffan Moser burger zu Vecklaprugk eliche hawsfraw, mein undertanig willig dienst bevor und fueg eurn gnaden undertanigklich zu wissen, das ich zu ainem staten ewing kauff verkauft hab meinem lieben swager Taman Hochreittersperg in Lochkiricher pfarr, Anna seiner hawsfrawn, meiner lieben swester, all mein eribschaft und gerechtigkait, so ich ungevarlichen bey in gehabt hab an und auf dem halbm guet genant die Hueten, pringt ain firtail an dem gantzen guet gelegen in Kirichamer pfarr bey der Lauttach zu nachst Leiten, das dienstper ist eur gnaden gotzhawss, und pit dar auf eur gnad mit aller undertanigkait, eur gnad welle bemeltem meinem swager und swester und irn baiden eriben am gewonlichen lantlewffigen kaufbrief nach ewr gnaden gotzhawss gewonhait und landes ob der Enns gerechtigkait darumb verdtigen und mit eur gnaden insigl bestaten. So das beschiecht, gelob ich eurn gnaden in ewer insigl noch vertigung nichts zu reden und sende eurn gnaden dar umb die offen petzetl, ververtigt durich meiner vleissigen gebet willen mit der erbern und weisen Sigmund Rauchenzawner und Wolfgang Knutzinger, baid burger zu Vecklaprugk, beder zu rugk aufgedrugkten petzat, doch in irn eriben und petzaten an schaden, dar under ich mich obemelte Margret und fur all mein eriben verpinde mit meinen trewn aidesweis, alle maynung der petzetl war und stat zu halten. Sein zewgen der gebet umb die petzat die erbern Ulreich Fleischacker, Wolfgang Fleischacker, Lienhart Veldner, all burger zu Vecklaprugk. Geben an mittichen in den osterfeirtagen nach Christi gepurt tausent vierhundert und im sibenundnewnczigisten jar.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 512, Nr. 3427