Nos Bernhardus, dei et apostolice sedis gracia episcopus Libanensis, reverendissimi in Cristo patris et domini domini Cristoffori eadem gracia episcopus Pataviensis in pontificalibus cooperator, salutem in domino sempiternam. Noverint universi quoniam petitio nobis pro parte reverendi in Christo patris et religiosorum virorum domini Johannis abbatis et conventus monasterii beate et gloriose virginis Marie sanctique Kiliani martiris in Lambaco ordinis sancti Benedicti Pataviensis diocesis oblata continebat, quod anniversarius dies dedicationis capelle in honore sanctorum Nicolai et Blasie am Stadel dedicate et constructe eidemque annexe ipsa die inventionis sancti Stephani prothomartiris hactenus celebrari consueverit et annuatim peragetur, que quidam dies iuxta sacrorum canonum tradiciones celeberrimus haberi debeat, verum propter solemnitates dedicacionum vicinarum aliarum ecclesiarum et capellarum que similiter eadem die habentur populus a visitacione dicte capelle abstinet et sic salutem animarum suarum et indulgentias consequendas negligit ac dedicacio capelle huiusmodi minus solemiter peragi possit, unde nobis humiliter et devote extitit supplicatum quatenus dedicacionem dicte capelle sanctorum Nicolai Blasii am Stadel in alium diem transponere dignaremur. Nos vero attendentes peticionem huiusmodi fore justam et consonam racioni cupientesque salutem procurare animarum et quoad possumus que minus culte fiunt in melius reformentur, ad laudem et honorem omnipotentis dei gloriose virginis Marie, sanctorum Nicolai et Blasii et totius celestis ierarchie anniversarium dedicacionis diem predicte capelle Nicolai et Blasii pontificum ex premissis aliisque causis racionabilibus matura deliberacione prehabita auctoritate nobis concessa et qua in hac parte fungimur transponendum et transferendum duximus transferimusque et transponimus per presentes et statuentes ipsum ex nunc et in antea futuris perpetuis temporibus dominica die proxima post festum sancti Jacobi apostoli mayoris annuatim laudabiliter et devote celebrari. Cupientes igitur, ut capella supradicta cum altaribus eiusdem congruis frequentetur honoribus et a christifidelibus iugiter veneretur et decenter inveniatur ac in suis structuris debite conservetur et reparetur, et ut fideles Christi ipsi eo libencius devocionis causa confluant ad eandem quo ibidem celestis dono gracie uberius conspexerint se esse refectos, nos de omnipotentis dei misericordia ac beatorum Petri et Pauli apostolorum eius auctoritate confisi omnibus et singulis utriusque sexus christifidelibus, qui dictam capellam et altaria eiusdem in nattivitatis, resurreccionis et ascensionis domini nostri Jesu Christi et pentecostes ac singulis gloriose virginis Marie omnium sanctorum et corporis Christi necnon ipsius capelle patrociniorum et dedicacionis festivitatibus devote visitaverint et ad reparacionem, conservationem, augmentacionem eiusdem necnon calicum librorum luminarumque ac aliorum ecclesiasticorum ornamentorum pro divino culti inibi necessariorum manus suas prompcius porrexerint adiutrices de quolibet festorum predictorum quadraginti dies criminalium et octoginta venialium peccatorum de iniunctis eis penitenciis misericorditer in domino relaxamus futuris perpetuis temporibus duraturis. In quorum fidem et testimonium presentes literas fieri nostrique sigilli pontificalis iussimus et fecimus appensione conmuniri. Datum et actum anno domini millesimoquadringentesimononagesimoseptimo in die Michaelis que erat penultima mensis septembris.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 541-543, Nr. 3443