Maximilian von gots gnadn Romischer kunig etc.

Ersamer geistlicher lieben andechtiger. Wir haben dir nagstmals geschriben und bevolhen zwen deiner convenntbrueder, so verstenndig und aines guten ordennlichen geistlichen leben sein, in das closter zu Gotweig zu schikhen nach lawt unnsers briefs darumb ausganngen, das aber, als unns der ersam geistlich unnser lieber andechtiger n. der abbt daselbs zum Gotweig bericht, bisher durch dich nicht bescheen sey, das unns von dir befrombdet, und emphelhen dir demnach abermals ernnstlich und wellen, daz du auf das vorgemelt unnser begern nochmalen ainen convenntbruder wie oben antzaigt ist, daselbshin gen Gotweig unverczogennlichen schikhest, da wellen wir denselben ain zeit lanng mitsampt etlichen so wir aus anndern reformierten clostern sannd Benedicten ordens auch erfordert haben zu notdurfft des obgenannten closters zum Gotweig und des regl daselbst geprauchen und damit ferrer nicht vertziehest. Daran tust du unnser ernnstliche maynung. Geben am freytag nach des heiligen Crewtztag Exaltacionis anno domini etc. lxxxxvii unnserer reiche des romischen im zwelifften und des hungrischen im achten jarenn.