Dem erwirdigenn in got und geistlichenn hern hern Johanns abbt zu Lambach unserm gnedigen hern embietn ich Wolffgang weilent Hannsen Swertfegers seligen sun, und ich Brigida sein hawsfraw weilent Matheus Lackners zu Reckshaim seligen tochter, unser gehorsam dinst bevor, und fugen ewrn gnaden ze wissen, das sich die erbern unser lieber swager und pruder Sigmund Lackner zu Reckshaim, sein hawsfraw Margret mit unns durch rate erber leut frundlich redlich gericht und geaint haben von wegen unnser erbschafft und gerechtikait aller besondern meiner benanten Brigida vaterlichen muterlichen auf anligenden und varendem guet ungeverlich, hieinne nichts ausgenomen, so wir haben und haben gehabt an und auf dem Lackner guet allen seinen rechtlichen zugehorungen zu Reckshaim gelegen in Everdinger pfarr Tanawtaler landgericht, und rurt mit erb von ewrn gnaden dem erwirdigen gotshaws Lambach, davon sy uns gefertigent haben mit ainer summa gelts, der wir von in gantz bezalt und genugig gemacht sein, ewr gnaden demuticlichen bittend, welle gereichen dem benanten Sigmunden Lackner, Margreten seiner hawsfrawen und irer paider erben gewondlich landleuffigen verzeihbrief darumben geben und mit ewr gnaden insigl bestaten und verfertigen. Wann das beschehen ist, alsdan globen und versprechen wir obenanten fur uns und unser erben ewrn gnaden dem benanten gotshaws, ewrn nachkomen in solh bestat brief und sigl nit ze reden, dawider nichts sprechen, handln nach thun jezt nach furan zu ewigen zeiten in kainerlai weis treulich und ungeverlich. Des zu urkund senden wir hie ewrn gnaden den offen petbrief versorgt mit der erbern weisen Jorigen Mullehner, ewr gnaden ambtman und Jorigen Englhawsers purger zu Wells zuruck aufgedruckten petschadten, die wir vleissig darumb gepeten haben im und iren erben an schaden ewrn gnaden und benantem gotshaws Lambach an iren gult, gerechtikait und aller vodrung unvergriffen, under ewr gnaden insigl und die bemelten petschad wir obenanten paid uns und unser erben verpinden treulichen aidesweis maynung berurter verzicht stat vesst ze halten. Zewgnus diser sachen die erbern Hanns Spiegl und Hanns Mullehner. Geben an mitichen nach sand Veits des heiligen martrer tag von Crist geburd vierzehnhundert im siebenundneunzigisten jaren.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 533f, Nr. 3436