Dem erwirdign in got und geistlichnn herrnmn herrnn Johannsen, abbt zw Lambach, unnserm genedign herrnn enbietn wir, ich Wolfganng Leytner in Wartperger pfarr gesessn weilent des Sigmund Grebmer brueder, ich Anna, weilent des yetzbemelten Sigmunden Grebmer an der Spor in Petnpacher pfarr gesessn salign witib und nemben uns an fur Magdalena, Margrethen und Anna geswistratn des obemeltn Grebmer saligen kinder, unnser undertanig dinst sein ewrer gnaden altzeit bevor. Wir fuegn ewrn gnadn zw wissn, das wir uns anstat der obemelten geswistrattn verzign habm und verzeichn uns wissentlich in krafft des brifs gegn Magdalena, des Wolfgangn zu Aschach ennenkchl und gegn allen sein erbn von wegn der hueb akcher auf der Valtansod mit seiner zuegehorung in Zeller pfarr gelegn, die dinstpar ist der erwirdign styfft und gotshaws zu Lambach als, ewr gnadn an dem verzeichbrif, so ewrn gnadn furpracht wird, vernemben werdet. Auf solichs bittn wir ewr gnadn mit allem vleiss, ewr gnaden welle ain verzeichbriff mit ewr gnadn anhanngundten innsigil bestatten und vertign und so das also beschechn ist, gelobm und versprechn wir ewrn gnadn fur uns und anstat der vorgemeltn geswistrattn und fur all ir erbn furan in ewr gnadn bestat und vertigung nichtz nit mer ze sprechen, reden habn sullen noch wellen in kainerlay weiss ungeverlichen. Mit urkundt des brifs bewart durich unser vleissiger bet willen mit des edlnn vesstn Valentin Feychter phleger zu Seyssnburg aufgedruckhtn petschadt, im und sein erben an schaden. Zewgn der sachn und umb das petschadt sein die erbern Jorig Stapfner, Erhart Strasmulner, Syman Muerr, wirt zu Petnpach. Geben an montag nach sand Dorothea tag nach Kristi gepurt vierzehenhundert und im achtundnewnzigistn jare.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 550f, Nr. 3451