Dem erwirdigen in got und geistlichen herrn herrn Johannsen abbt zu Lambach unnserm genedigen herren enbewten ich Gilig Hueter, burger zu Swanns, ich Wolfganng bey dem Pach, sein bruder, ich Lienhart zu Enntzlesperg in Atzpeckher pharr gesessen, und ich Elsbeth sein swesster daselbs, unnser gehorsam willig dinst bevor und fugen ewrn genadenn ze wissen, daz wir recht und redlichen verkaufft und ze kauffen geben haben Michln Osterpawrn zu Praytenschutzing und seinn erben unnser zwen geleich dritt tail so wir ungeverlich gehabt haben an und auf der Muelichhub zu Praytenschutzing und irer rechtlichen zugehorungen in Swannser pharr gelegen, erbrecht von ewrn genaden und ewr genadenn gotshawss umb ain summa gelts, der wir von in ganntz und gar ausgericht und betzallt worden seinn zu rechten tegen on allen schaden. Hieauf bitten wir mit diemutigem vleis ewr genad welle dy berurtn unnser geleich tail der bestimbten hubm dem genantn Micheln Osterpawrn und seinn erben genedigklich bestetten und verleihen und daruber genugsamlich kawfbrief mit ewr genaden innsigl verfertigt geben, daz beschehen geloben wir fur unns und all unnser erben in sollich ewr genaden bestett, brief und sigl nit ze reden noch dawider ze tun in kainer weis, sonnder anweisung derselben stathaltund umb ewr genad altzeit gehorsamlich zu verdienn. Zu urkund sennden wir ewrn genaden des allso dy offenn petzetl unnter der erbern Micheln Hueter, burger zu Swanns und Andreen Hueter zu Schloth in derselben pharr gesessen aufgedruckhten petschadten, dy wir mit vleis darumb gebetn haben, doch ewr genad ewr genaden gotshawss und nachkomen auch denselben Micheln Hueter und Andreen Hueter und iren erbern on schaden in allen sachen. Des kawffs und umb dy petschadt sein zewgen dy erbern Jorg Hueter, burger zu Swanns, Sigmund Mulner zu Aspoltern, Sigmund Ganngl daselbs, Wolfganng ausm Hof und Hanns Kotpawr zu Oberhardarn. Geben an phintztag vor sannd Philipp und Jacobs tag des heiligen zwelfbotenn anno domini in dem lxxxxviii^o.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 557f, Nr. 3457