Erwirdiger in got genediger lieber herre mein undertanig dienst ewrn genadn bevor. Mich habn dy hofvischer hye und Waydhawsn bericht, wie ewrn genadn stegk vischer mit etlich dingen auf dem wasser unpillicher arbait halbm wider alt herkomen von den irnn mermalln begriffn und sew gebettn, solhn abzusten, das sy zu thun geret aber nicht gehaldn, dar durch sy geursacht und in verbotn zewn ausgehebt und gepfent mir solhs verkund, hab ich sew fur ewr gnad gewisn solhs an ewr gnad zu pringen, das beschehn und auf ewr gnadn erbieten pringen sy ewren gnadn den zeug und bit ewr gnadn alls mein genedigen hern ewr gnad werde geburlich dar in handln damit dy vischer anfang meiner verwesung uber mich nicht schreyen, wan mit in kainem wegn wider ewr gnad zuthun nicht willens hab und will das umb ewr gnad willig verdien. Geben eritags vor Margarethe im 98.

Cristoff Breinhofer||
vischrichter zu Wells