Dem erwirdigen geistlichen unnserem genedigen lieben herrn herren Johannsen abbt zu Lambach embieten wir ich Jorg in der Wis zu Mornpach und nymb mich an gewalt fur meine geswistredt Colman, Anna, Pawl und Sibilla, ich Wolfgang Schewbl zu Hofaren, ich Barbara Jorgen zu Hatenperg aufm Strolehen gesessen hawsfraw, ich Wolfgang Hannsen Leyttner weilend zu Leyten gesessen seligen sun, ich Sigmund, ich Mathews, ich Georg, ich Margreth und ich Barbara alle funfe geswistredt weylend Lienharten zu Pallting gesessen seligen kinder, ich Elsbeth und ich Anna geswessteren baid Asems weilend am Durrnperg gesessen seligen tochter unnser willig dinst bevor und fugen ewren genaden ze wissen, daz wir recht und redlichen verkawft und zekawffen geben haben unnserem lieben vetteren Chunraten dem Zehentner zu Penebang, seiner hawsfrawen Margrethen und seinen erben all unnser erbschaft und gerechtikait, so wir ungeverlich gehabt haben an und auf dem gut zu Pallting in Penebanger pharr gelegen, da weilend der Philipp daselbs auf gesessen und ist nwn rechts freys aigen, umb ain summa gellts, der wir von in von in zu rechten tagen an allen schaden ausgericht und betzalt seien. Und bitten darauf ewer genad mit untertenigem vleis, wellet demselben Zehentner, seiner hawsfrawen und seinen erben umb und uber sollich unnser erbschaft und gerechtikait ain genugsamen kawfbrief nach lanndsgewonhait mit ewer gnaden anhanggunden insigel verfertigen. Das beschehen geloben wir fur uns all unnser erben in sollich ewer gnaden insigel und verfertigung nicht zerreden noch dawider stathalltund umb ewer genad unnsern gnadigen herren zuverdienen. Zu urkund sennden wir ewren genaden des allso den offenn petbrief unnter der erberen Hannsen Hynnterpeckhen und Wolfganngen Smids baider burger zu Lambach aufgedruckhten petschaden bewart, dew wir all obbenant verkawffer vleissig darumb gebeten haben, in und iren erben on schaden. Geben an sand Margarethen abent der heiligen junckfrawen anno domini etc. lxxxxviii.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 568f, Nr. 3465