Dem erwirdigen geistlichen meinem genedigen und lieben hern herrn Johannsen abbt zu Lambach embieten ich Steffan, weilend Steffan Weisman am Nidernstadl gesessen seligen sun, und ich Elsbeth, des Andre Eysl weilend burger zu Lambach seligen witib und des erst bemelten Steffan muter, unnser willig dinst bevor und fugen ewren genaden ze wissen, daz wir recht und redlichen verkawft und zu kawffen geben haben Steffan dem Planckhen zu Ulrating, seiner hawsfrawn Elsbethen und iren paiden erben all unnser erbschaft und gerechtikait, so wir ungeverlich gehabt haben an und auf dem gut zu Ulrating und seiner rechtlichen zugehorung in Widmspeckher pharr gelegen, erbrecht von dem erwirdigen gotshaws Lambach umb ain summa gellts, der wir von im gantz ausgericht und betzalt seinn zu rechten tagen on allen schaden. Auf sollichs pitten wir ewr genad unnsern genedigen hern [mit] diemutigem vleis, wellet benantem Planckhen, seiner hawsfrawn und iren paiden erben umb und uber sollich unnser erbschaft und gerechtikait genugsam brief mit ewer genaden insigl bestett und verfertigt geben, geloben wir fur unns und all unnser erben in sollich ewer genaden brief und sigl nit ze reden noch dawider ze tun in kainer weis, sonnder daz dyselben ewer genaden brief und sigl ausweisen stat halltund mit diemuetiger gehorsam umb ewer genad zu verdienen. Des zu urkund sennden wir ewern genaden allso den offenn petbrief besigelt mit des edeln vessten Georgen Sachsen zu Albmeckh aufgedruckhten insigel, den wir auch mit unntertenigem vleis darumb gebeten haben, im und seinen erben on schaden. Des sein zewgen Hanns Steger am Egkhof und Sigmund Steger an der Stegmul gesessen. Geben an suntag cantate anno domini lxxxxviii^o.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 361, Nr. 3459