Dem edlnn Kilian Leroch ambtman am Stadl embieten ich Wolffgang Aigner, burger in der Obernzell under Passaw, ich Bartolomee Aigner, burger zu Melk, unnd ich Barbara, Hannsn Tachawrs mawter aufm Saltzturn zu Wienn hausfraw geswistred, Oswalden von Gugerellen gelassen kinder, ich Wolfgang wirtt zu Puhl, ich Margret, Thoman Aigners am Aigen hausfraw, und ich Barbara Hannsen Omlinger von Groltzhaim in Weybarner pfarr hausfraw geswistred Sigmund am Aigen weilent in Puhler pfar gelassen tochter unnser gar willig dienst zuvor. Wir fugen ewr vesstikait ze wissen, das wir unns gegen den ersamen weisen richter und rate zu Wells und gemainer stat daselbs verpflicht und verschriben haben sy alles unsers frunds Andree Aigner schneider seligen daselbs mit tod verschinen verlassen hab und guets wegen, das sy unns als nahsten erben zu unsern handen geantwort an all ansprach auch gegen aller meniclichn an allen schaden halten sullen und wellen jczt unnd furan kunfticlichen. Wir haben sy auch des bemelten hab und guets alles quittirt und ledig gezelt inhalt der verschreibung, so wir euch hiemit zusenden vernemen werdt, bitten wir ewer vesstikait mit gantzem vleis, ir wellet dieselb unser verwilligung und verschreibung mit ewern insigl fertigen und bestaten, wann das bescheen ist, globen wir obenanten fur unns all unser erben und nachkomen euch ewern erben und nachkomen in solh brief und sigl nichtz ze reden dawider nichts sprechen, handln noch thuen jezt noch furan zu ewigen zeiten gar in kaine weis all gevar hieinne gentzlich hindangesetzt. Mit urkund des briefs so wir ewr vesstikait senden versorgt mit unser der obenanten Wolffgangen Aigner und Bartolmee Aigner gebruder und Wolfgangen wirtt zue Puhl alle dreir aufgedruckten petschadten so wir fur unns und an stat der andern erben obenant auf ir vleissig gepet und fur all unnser erben hie aufgedruckt haben inhalt berurter verschreibung stat ewig vesst treulich an aidesstat ze halten. Geben an montag vor unsers herrn auffart tag anno eiusdem lxxxxoctavo.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 564-566, Nr. 3462