Dem hochwierdigen und geistlichen herrn Johannssn abtte zw Lambach unnsern genadigen herrn empewt ich Hannss und ich Ursulla, sein schwester und yetzt Hannssn am Glett elliche hausfrawn, und wir baide weillent Erhartn am Glett salligen kinder, unnser willig diennst bevor, und thuen ewern gnadn tze wissen, das wir recht und redlichen tzw gantzer und ewiger vertzicht ains erbern und zimlichen bechsll veraint und tann haben, also das wir alle dy erbschafft und gerechtigkait mit aller seiner zuegehorungn, so wir gehabt haben an dem drittaill aus dem miteren trittaill in ainem guett tzu Odllpotting und ist ewern gnadn gotshaws dienstpars guet in Tawfkircher phar und Edlinger gericht gelegen, da hingegen sy unns herwider in beschll geben all ir eribschafft und gerechtigkait, so sy hatt an und auf dem unttern guet am Glett inn Kalhaimer phar und Edlinger lanndgericht gelegen. Auf solhen obemelten bechsll haben wir unnser swester Elsbettn hin ausgeben symb schilling phening, darauf wir baide Hanns und Ursulla ewr gnad als unnsern genadigen herrn, ir wallett egemelter unnser swester Elsbettn und allen irern erben umb dy ebemelt unnser eribliche gerechtigkait brief mit sidl geben, wans das also beschechen ist, alls dann darnach geloben wir obenante geswistrat und fur all unnser erben ewern genadn und allen ewern genadn nachkomen, das bey unnsern eren und trewn und an aidesstat auch mit kraft des bette briefs, das wir yetzt noch hinfur in ewer genadn sigl nichtz einreden wellen weder wenig noch vill, wann das unnser guetter will und vleissiger bette ist und senntn des darumben ewern gnadn den offen bette brieff, verpetschaftn durch unnser egemeltn geswistrat vleissiger bette willen mit des erbern weissen Wolfganng Althag, des Wolfganngn von Haimpuech ellicher sun und yetzt ewern genadn ambtman gein Lambach aigen ausen aufgedruchtn petschaft, doch im und allen sein erben, auch ewern genadn und allen ewern genaden nachkomen und dem gotzhaws Lambach an aller obrigkait unbegriffenlich und an schaden, umb ewr genadn sidl und umb das petschafft auf den bette brieff sind zeugen die erberen weissen Mert Fleischakher, Jorig [...]oden, Mert Schlierleytner, Thonmon tzu Furt. Geschechen phintztag nach sand Warbara tag nach Cristii unnser lieben hern geburde viertzechenhundert und achtundnewnzigisten jaren.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 586-588, Nr. 3484