Dem erwirdigen in got und geistlichen herrn Johannsn abbte zu Lambach empewt ich Margreth des Joring Mair am Emperg in Thalhaimer pfar eeliche hawsfraw, und ich Magdalena, Hannsn zu Kumpling hawsfraw und Erhardtn amb Gled saligen tochter, unnser gehorsam willig unndertanig dinst bevor und fuegen ewren genaden zu wissen, das wir all unnser erbschaft und gerechtikait, so wir ungeverlich gehabt habm an dem gut zu Adlpoting mit aller zugehorung in Tawffkircher pfar gelegen in Edlinger gericht, das dan dinstparr urbar ist ewrer gnaden gotshaws Lambach zu statem ewigen kawff verkawft habm unnserm liebm swager und swestern Wolfgang Reschn zu Adlpoting, der yetzund hewslich darauf sitzt, Elspechten, seiner hawsfrawn und allen iren baiden erbm umb ain summa gelts, der wir von in schon entricht sein nach unnserm wolgefallen. Darauf bitten wir ewr gnad mit sonnderm vleis, wellet denselben unnserm swager und swester und allen irn baiden erbm ain genuegsamenn lanndtlewffigen kaufbrief daruber verfertigen, wan ewr gnad das getan hatt, so globen wir ewer genaden fur unns, all unnser erbm in ewr vertigung brief und insigl nicht zu reden vil noch wenig in kainerlay weis ongevor. Des zu urkundt schiken wir ewren genaden den offen betbrief verfertigt durch unser vleissigen gepet willen mit des erbern weisen Wolfgang Hainpuecher an den zeitn ewr gnaden ambtman aufgedrucktn petschadt, doch im, sein erbm an schaden, darunder wir uns obgemelt zwo swestern fur uns all unser erbm verpintn bei unsern trewen ain aidesweis alles das war und stat zu haltn in halt des betbriefs. Zewgen der gepet umb ewr genaden insigl und umb das gegenwurtig petschadt sind dy erbern Jorg Vaschang zu Gaspottzhofen, Sigmund Altenhofer, Sigmund Peckh zu Inn und mer frumer lewt genueg. Gescheen in montag vor Philippi nach Crist gepurde viertzehenhundert und in dem newnundnewntzigisten jarnn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 605f, Nr. 3500