Dem erwirdigen in [got] und geistlichen hern hern Johannsn abtte zu Lambach embeut ich Elspecht Gattringerin zu Gattring, ich Thoman Graff zu Pletich, und ich Preid, des Steffan zu Mulperg eeliche hawsfraw, unnser gehorsam willig unndertanig dinst bevor. Wir fuegen ewrn gnaden zu wissen, das wir recht und redlich all unnser erbschaft und gerechtikait, so wir erblich gehabt habm an dem Grafen guetllein zu Nidernentarn mit aller zugehorung in Geboltzkircher pfar gelegen in Starhenberger gericht, das dan ewrer gnaden gotshaws Lambach dinstpars urbar ist, zu ainem statem ewigen kawf verkawft haben unnserm lieben swagern und vettern Wolfgang Grafen zu Nydernentarn, der ietzund hewslich darauf sitzt, Margrethen seiner eelichen hawsfraw und allen iren baiden erbm umb ain summa gelts, der wir von in schon entricht sein nach unnserm wolgefallen. Darauf bitten wir ewr gnad mit sonnderm vleis wellet bemeltem Grafen seiner hawsfrawn und allen iren erbm ain genuegsamen lanndtlewffigen kawfbrief daruber verfertigen. Wan ewr gnad das getan hat, so geloben wir ewren gnaden und ewren nachkomon fur uns, all unnser erbm in ewr vertigung brief und insigl nicht zu reden vil noch wenig in kainerlay weis angevor. Zu urkund schikhen wir ewren genaden den offen betbrieff verfertigt durch unser vleissigen gepet willen mit des erbern weisen Wolfganng Hainpuecher, der zeit ewr gnadn ambtman aufgedruktn petschadt, doch im seinn erbm an schaden, darunder wir unns fur uns, all unser erbm verpintn mit unnsern trewen aidesweis alles das war und stat zu haltn inhalt des betbrief. Zewgen der pet umb das petschadt sind dy erbern Thoman Schuester zu Gattring, Hanns zu Haslach, Leonhart Sneider zu Geboltzkirchen, Wolfgang Wagner zu Roswang und mer frumer lewt genueg. Gescheen an freytag vor Philippi nach Cristi geburd viertzehen hunndert und im newnundnewntzigisten jarn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 603f, Nr. 3499