Erwirdiger geistlich lieber herr mein dinst in guetem willn bevor. Mich hat romischer kunigklicher maiestat unndertan Wilhalm Kriechpawm, richter zw Veclaprugk anbracht, das im und Thomann Haslinger ewr hofrichter der Paiss auf freier strass furgehalten, sy paid fanngklich mit gwalt angenomen hab, auch noch von im nit sicher sein, solher gwalt wider gmainen lannds frist an gemellten kunigklicher maiestat undertanen beganngn, mich von seiner kunigklichen maiestat wegn nit clain befrombd. Beger darauf in namen seiner kunigklichen gnadn, dy weil solh unczimlich und grob verhantlung aus ewrm gotshaws und durch dy ewrn beschehn ist, ir wellet denselbn Paissn mitsambt den anndrn, so mit im in der tat gwesn sein, darzue halten, damit dise verhanndlung gegn kunigkliche maiestat abgetan, auch dem richter und Tomann Haslinger umb ir clag benuegen getan werd. Datum Wells an mitichen vor Anntoni anno domini etc. lxxxxix

Caspar Perkchaimer zu||
Wirting vicztumb ob der Enns