Dem erwirdigen in got und geistlichen herrn hern Johannsn abbte zu Lambach enpewten wir ich Veicht, ich Wolfganng, ich Dorothea des Wolfgangn Guetlein zu Horipach hawsfraw, und ich Hanns Zaglawer, alle viere geswistrat, Leonhartn Schneider amb Gasteig saligen eeliche khinder unnser gehorsam willig undertanig dinst bevor. Wir fuegen ewren genaden zu wissen, das wir all unnsere geleiche erbschaft und gerechtikait, so wir gehabt habm an dem Obernkrewtzlehen zu Horipach und an dem Aigen daselbs mit aller zugehorunng in Gaspoltshofer pfar gelegen in Starhenberger gericht, dy dan dinstpars urbar sind ewrer genaden gotshaws Lambach, zu statem ewigen kawf verkawft habm unnserm lieben bruedern Micheln Hubmer zu Horipach, Margrethen seiner hawsfrawen und allen seinen erbm, dy er hat oder noch kunnfftigklich gewindt, umb ain summa gelts, der wir von in schon entricht sein nach unnserm wolgefallen, als ewr genad das an dem kawfbrief hinfur mit mer worten vernemen werdt. Darauf bitten wir ewr gnad mit allem sonnderm vleis, wellet demselbenn unnserm bruedern Micheln Hubmer, seiner hawsfrawen Margrethen und allen seinen erbm ain genuegsamen lanndtlewffigen kawfb[rief da]ruber mit ewrem insigel verfertigen, wan ewr gnad das getan hat, so globen [und verspr]echen wir ewren gnaden und ewren nachkomen fur uns, all unns[er erben in ewr vertig]ung brieff und insigl nicht zu reden vil nach wenig in k[ainerlay weis ongevar und d]es zu urkund schickhen wir ewren gnadn den offen betbrief verfer[tigt durch un]nser vleissigenn gebet willen mit des erbern weisn Thoman Capeller an[... e]wrer gnaden nachrichter aigen aufgedrucktn pet schadt, doch im, sein erbm und [pets]chadt an schadn und unvergriffen ewren gnaden dinstn, vordrung, oberkait und rechtn in allen sachen, darunder wir unns obgemelte vier geswistrat fur unns, all unnser erbm verpinten bei unnsern trewen, eren und aidesweis alles das war und stat zu haltn in halt des briefs. Zewgnus der sachen und der gepet umb das gegenwurtig petschadt sind dy erbern Sigmund Altenhofer, Leonnhart Hinderholtzer, Sigmund Erbler und mer frumer lewt genueg. Gescheen an sambstag vor Sebastiani nach Crist gepurde viertzehenhundert und in dem newnundnewntzigisten jarn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 593f, Nr. 3491