Dem erwirdigen in got geistlichen hern herrn Johannsen abbt zu Lambach embieten [wir] Lienhart Sneider zu Guttaw, Sigmundt, Urban, Margreth, Dorey [...]eg, alle sechse geswistredt, Hannsen Obernperger, weilen[t ...] gesessen seligen kinder unnser gehorsam willig dinst bevor und f[uegen ewrn gn]aden zewissen, daz wir unns von wegen des benanten Obern[pergers, unser]s vater seligen verlassen erbschaft und gerechtikait, so derse[lbe ...]nd unns nach tod und abgang desselben unnsers vater seligen erblich[...]n und anerstorben ist an der Taferne zu Strass und an den ackh[...]grunndten allenthalben im purkfrid daselbs gelegen, wie dann die in dem lehenbrief, so er an stat sein und seiner miterben daruber gehabt hat aygentlich genant und bestymbt seinn, mit unnserm lieben swager Sigmunden Smidt zu Strass daselbs gesessen und seiner hawsfrawn Anna unnser lieben swesster gutlichen vertragen, dy unns ein gut vollig benugen fur daz alles getan haben mit ainer summa gellts, der wir von in ganntz und gar entricht und benugt sein. Hierauf bitten wir ewr genad mit diemutigem vleis, wellet denselben unnsern swager und swestern umb und uber sollich all unnser erbschaft und gerechtikait genugsam brief, sovil sy daruber bedurffen in und iren baiden erben lawtendt unnter ewrm insigel verfertigt geben, geloben wir fur unns und all unnser erben in sollich ewr genaden brief und sigel nit ze reden noch dawider ze tun in kainer weis, sonnder alles so dyselben e. g. brief und sigel ausweisen stat halltund in unntertenigkeait umb ewr genad zu verdienen. Zu urkund sennden wir des ewrn genaden den offenn pettbrief unnter der erbern Lienharten Pockhlhofer, der zeit marcktrichter zu Guttaw, und Hannsen Hinnterleyttner und Georgen Sneyder, baider burger daselbs aufgedruckhten petschaden, dy wir mit vleis darumben gebeten haben, in und iren erben an schaden. Geben an sand Pawls abent seiner bekerung anno domini etc. lxxxxviiiio.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 595f, Nr. 3492