Dem erwirdigen und geistlichen meinem genedigen lieben herren herrn Johannsen, abbt zu Lambach embewt ich Wolfgang Kursner zu Vorchdorff und nym mich an vollmechtigen gewallt fur meinew geswistredt mit namen Mertan Awer, burger zu Krembs, Leonharten Awer, burger zu Hainburg und Benignam, des Wolfgangen Vleischackher zu Vorchdorff hawsfraw, weilend Ulrichen zu Enntarn seligen kinder unnser gehorsam unndertenig dinst bevor. Ich fug ewrn genaden ze wissen, daz ich all mein erbschaft und gerechtigkait und der dafur ich mich angenomen an dem Oberngutlein zu Entarn mit seiner zugehorung in Gebolltzkircher pharr gelegen, daz dann dinstpars urbar ist ewr genaden gotshawss Lambach zu stetem ewigen kawf verkawfft und zu kawffen geben hab meinem lieben vettrn Hannsen Kursner zu Haslach in Gebolltzkircher pharr gesessen, Katherina seiner hawsfrawn und allen iren baiden erben umb ain summa gellts, der ich von in ganntz und gar aus gericht und betzallt worden bin zu rechten tagen on allen schaden. Darauf bit ich ewr genad mit diemutigem vleis, wellet bemelltem meinem vettern seiner hawsfrawn und allen iren baiden erben einen genugsamen lanndtlewffigen kawfbrief daruber verfertigen, wann ewr genad daz getan hat, so gelob ich ewrn genaden fur mich, dy dafur ich mich angenomen hab all mein und derselben erben in ewr genaden vertigung brief und innsigl nicht zu reden vil noch wenig in kainerlay weis ongever. Des zu urkund schickh ich ewrn genaden den offen petbrief verfertigt durch meiner vleissigen gebet willen mit der erbern weisen Wolfgangen Hainpucher an den zeiten ewr genaden ambtman und Hannsen Stegmair zu Kirchdorff, baider aygen aufgedruckhten petschadt, doch in, iren erben on schaden, darunder ich mich benanter Wolfganng Kursner fur mich all mein erben und dafur ich mich angenamen hab, all ir erben verpind mit meinen trewen an aydesstat alles daz war und stet zu hallten innhaltt des petbriefs. Zewgnuss der sachen unnd gebet umb dy zway petschadt sind dy erbern Sigmund Hochreiter, Wolfganng Holltzman und Jorg Vaschang. Geschehen an eritag vor Viti nach Cristi geburde viertzehenhundert und im newnundnewntzigsstn jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 609f, Nr. 3504