Dem erwirdigen geistlichen unnserm genedigen und lieben herren herrnn Johannsen, abbt zu Lambach enbewten ich Margreth, Micheln zu Pawngarting in Lohkircher pharr hawsfraw, und ich Magdalena Wernharten im Enntzntal auch in berurter pharr gesessen hawsfraw, baid Hannsen weilend zu Pawngarting daselbs gesessen seligen tochter, unnser gehorsam willig dinst bevor und fugen ewrn genaden ze wissen, daz wir recht und redlichen verkawfft haben unnsern geleichen drittail an und auf der halben wisen in der Praytenaw in Widmspeckher pharr zwischen des Loblens und des Puhlmairs zu Rewthaim wisen gelegen, ist dinstper und urbar gut ewr genaden gotshauss und haben denselben unnsern geleichen drittail ze kawffen geben Sigmunden zu Pergarn seiner hawsfrawn Anna und iren baiden erben umb ain summa gellts, der wir von in ganntz und gar ausgericht und betzallt worden sein zu rechten tagen on allen schaden. Darauf bitten wir mit diemutigem vleis, ewr genad welle denselben unnsern geleichen drittail bestimbter wisen und irer zugehorung benanntem Sigmunden zu Pergarn seiner hawsfrawn Anna und iren baiden erben genedigklich bestetten verleihen und daruber genugsam brief und sigl geben, geloben wir fur unns und all unnser erben in sollich ewr genaden bestatt brief und sigl nichts ze reden noch dawider ze tun in kainer weis, sonnder alles so dyselben ausweisen stat halltund alltzeit gehorsamlich umb ewr genad zu verdienen. Des zu urkunnd sennden wir ewrn genaden des allso den offenn betprief mit der erbern Sigmunden Semelpawrn zu Rayd, ewr genaden ambtman, und Wolfganngen Hayder zu Vorchdorff, baider aufgedruckhten petschaden bewart, dy wir mit vleis darumb gebeten haben, in und iren erbenn zu voran ewrn genaden ewrm gotshawss und nachkomen on schaden und unvergriffen in allen sachen. Geben an montag nach sannd Peter und Pawlls tag der heiligen zwelifboten anno domini etc. lxxxxviiii^o

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 611f, Nr. 3506