Wir Ludowich von Gotes gnaden Romischer Kunig, ze allen Zeiten merer des Riches Enbieten Goppolden Vitztu^em ze Langenuelt vnser huld vnd alles gu^et. Wir wellen, daz du die Schenchin von Grispach richtest zwischen hie vnd sand Michels tag, der schirest chu^emt, Sechs und zwaintzich phunt Regenspurger phenning vmb einer gantz gewant. Tu^est du^e des nicht, so hat vnser lieber getrewer der Schenk von Grispach gewalt vns vnd die vnsern ze phenden an vnsern vnd vnser Amptlseut zorn, vnd ze wem er phendet oder swer im phendet (sic!) hilfet, die su^eln auch vnser huld noch vnser Amptleut dar umb nicht enpern. Der brief ist geben ze dem Niwen Marcht des Montags nach vnser vrawen tag als si geborn wart, In dem vierden Jare vnsers Riches.

Source Fulltext: OÖUB 5 (Wien 1868) S. 230, Nr. 233