Anno domini millesimo CCC tricesimo quarto in vigilia beati Martini Patauie in domo chorali domni de Wintzsperch vocatis et congregatis canonicis capituli ecclesie Maticensis ad racionem faciendam cum domno Hainrico cellerario eiusdem ecclesie hec subsequentia sunt per prepositum et decanum et per capitulum statuta et debito ordine pertractata.Primum negocium est quod debent expediri littere racionum ex parte capituli et cellerarii Maticensis secundum formam protestacionis in capitulo factam, que taliter est penitus in hec verba:,Ego Hertnidus de Lampoting prepositus, Otto de Albrechtzhaim decanus et capitulum ecclesie Maticensis publice tenore presencium profitemur, quod anno domini millesimo CCCXXXIIII in vigilia beati Martini episcopi Patauie in domo chorali domni de Wintzsperch racionem perceptorum et distributorum bonorum ecclesie Maticensis audivimus a domno Hainrico Stainario, tunc temporis cellerario nostro ac eam admisimus, tali protestacione interposita et premissa quod salvis statutis et ordinacionibus capituli nostri permanentibus, quo ad officium et ministerium et pertinencias prebende cellerarii nostri ac alias etiam obvenciones et percepciones quascumque per ipsum novem annis receptas ad defalcacionem et recompensacionem hinc inde de anno in annum racione et quittacione debita perducatur, et si distributum cellerarii perceptumque de rebus capituli in racione futuri anni, que distincte et ordinata vicissitudine est facienda et computanda se invicem excessunt et excreverunt summarie evidenter, extunc tam capitulum quam cellerarius Maticensis ecclesie debent de comportata et excrescente alterius partis summa de anno ad annum successiva satisfactione, scilicet in sex librarum redditibus contentari et hoc tot et tanto durante exsolucionis annorum curriculo, donec alterius partis per racionem relicta obligacio penitus evacuata fuerit et extincta.‘Hanc quoque premissam et interpositam protestacionem de verbo ad verbum extunc prout et nunc volumus esse annis singulis tam preteritis quam futuris in nostris racionibus repetitam. Qua protestacione facta predictus domnus Hainricus cellerarius prefato capitulo Maticensi debitor hoc anno in iiij libris den. remansit, super quibus debitis iam dictis suam litteram dedit eidem capitulo Maticensi, sigillo suo proprio consignatam, cuius littere tenor sequitur in hec verba:,Anno domini millesimo CCCXXXIIII facta racione mecum per prepositum et capitulum ecclesie Maticensis ego Hainricus cellerarius predicte ecclesie remansi capitulo predicto in tribus libris cum dimidia obligatus et vectura vini a Patauia usque in Matze non est adhuc cum aliis suis attinenciis expedita.'Secundum negocium est, quod domno preposito et domno decano ex parte capituli conmissum est, ut eis adiuncta persona tercia, quam duxerint eligendam, recepciones aliquarum personarum pro honestate et utilitate ecclesie Maticensis eligant et recipiant secundum eorum conscienciam et prout eis visum fuerit expedire.Tercium est quod pro decem libris de pecunia domni de Druma per prepositum ex mutuo a capitulo receptis et de XVI libris de fructibus ecclesie in Chirichperch littere satisfactionis expediantur.Quartum est quod litteras nostre curie in Mawtoren de domo inferiori ad domum superiorem, prout possibile fuerit, transponatur (!) et quod area ipsius domus inferioris in vineam totaliter convertatur.Quintum est quod littere domni Vlrici de Gurten per ignem destructe cum sigillo capituli reformentur.Sextum est quod littera recepcionis Hainrici Orphani in gradu suo debito sigillo capituli renovetur.Septimum est quod euxenia (enxenia hs.) domnorum in subsequenti anno providencie cellerarii committantur, sic tamen quod canonicis equalis porcio de cellario vini suis locis et temporibus proporcionabiliter pro predictis euxeniis ministretur (enxeniis ministrentur hs.).Octavum est quod magister pro procuratore debet assumi.Nonum est quod statuta nostra sunt debito ordine registranda, ita quod ea que pertinent adx officium prepositi decani cellerarii custodis ac aliorum canonicorum et officiorum et beneficiorum ordine continuo et debito conscribantur. 

Original dating clause: in vigilia beati Martini

Language: Latein