Anno domini millesimo trecentesimo tricesimo nono, vacante decanatu ecclesie Maticensis post discessum honorabilis domni domni Heinrici dicti Stainer, decani quondam eiusdem ecclesie pie recordacionis, sana deliberacione canonicorum omnium residencium prehabita deliberatum et finaliter est decretum, ut inter parcialia plurima iam dicte ecclesie constituta litteris: particularibus conscripta, quamvis non omnibus inventis, magis necessaria in unam formulam texarentur. Missi sunt ergo a capitulo versus Patauiam circa festum Epyphanie Marsylius, Nycolaus, Heinricus canonici predicte ecclesie Maticensis ad eandem litteram roborandam per sigillum venerabilis domni domni Alberti prepositi Patauiensis, tunc temporis commendaticii prepositure Maticensis. Que littera coram eodem domno Alberto et magistro Andrea protonotario curie Patauiensis ac domno Gundakchero plebano de sancto Paulo et aliis sapientibus est attente perlecta, necessaria et utilis in omnibus articulis iudicata et per appensum sigillum eiusdem venerabilis domni domni Alberti prepositi et per sigillum maius eiusdem Maticensis capituli roborata, postmodum in congregacione omnium canonicorum ad electionem decani celebrandam firmiter approbata et tunc electi decani Maticensis honorabilis domni domni Ottonis proprii sigilli appensione firmius est munita. Cuius littere verbo ad verbum forma talis est: ,Albertus dei gracia prepositus ecclesie Patauiensis commendaticius prepositure Maticensis Patauiensis dyocesis, Otto decanus et totum capitulum ibidem omnibus quorum interest vel in futurum intererit salutem et rei geste agnoscere veritatem. Ea que a predecessoribus pro utilitate ecclesiarum sunt rite et racionabiliter constituta, merito sunt a successoribus gratanter approbanda et effectualiter observanda. Dudum igitur honorabilis vir domnus Hertnidus de Lampolting felicis recordacionis quondam prepositus ecclesie Maticensis predicte pro fratribus¹ ipsius ecclesie zelo ferventi perspicere² desiderans; pro reformacione eiusdem quedam statuta circa bona et iura eiusdem et precipue circa officium cellerarie de consilio et consensu capituli sui edidit sub modo et forma infrascriptis:1. Primo quod nullus . . . nisi prius resignet unum ex eisdem officiis, eligatur. ³ 2. Item quod electio cellerarii fieri debet in principio proventuum ecclesie, scilicet cum novalia instant, circa festum beati Petri et Pauli, nisi tempore alio quocumque propter quascumque causas cellerarium contingeret suum officium deserere vel resignare; tunc enim totali conputacione eius prehabita, vel electio alterius statim fiat aut per consilium capituli uni canonicorum officium committendo negocia necessitati ecclesie peragenda nullatenus negligantur. 3. Illi vero cellerario a canonicis capituli rite et concorditer electo, cui prius data fuit prebenda media, eidem amplius prebenda integra cum mortuariis et consueto feno et pabulo assignetur, omnibus aliis ecclesie redditibus seu obvencionibus exclusis, ut patet in antiquis nostris constitutis, quocumque nomine censeantur; et cum illa prebenda et sibi annexis tenetur expedire nuncios et raysas in negociis nostre ecclesie peragendis, ita tamen ut nulla negocia deliberacione digna idem cellerarius agredi vel perficere presumat, nisi prius super illis decani et capituli consilium habeatur. 4. Quibus si expedire videatur et causa requirat, predictus cellerarius unum coadiutorem de expensis eidem providendo ex canonicis coassumet. 5. Si tamen rayse fiant ad iudicia ad precones pro colonis ecclesie, debent coloni tales, nisi defectus nimius inpediat, cellerario expensas necessarias ministrare. 6. Item secundum antiquam consuetudinem hospites advenientes omnes cellerarius colliget, dummodo numerum duodenarium non excedant; tunc enim per decanum et presentes canonicos est cellerario subveniendum. 7. Cultura vero vinearum que communi cursu ad quatuordecim libras se extendit, expediri debet per eundem de steura proveniente in Trewbach, ad quam steuram exigendam et conputandam cum sepedicto cellerario ad eundem locum debent duo canonici annis singulis convenire; sed vindemium quod se extendit ad sedecim libras; et vectura vini ab Austria in Matzse ad viginti quatuor libras, de servicio feudorum et prediorum tocius ecclesie tempore messis colligendum debet adhibita diligencia procurari. 8. Illa autem que residua fuerint de steura predicta et de illis serviciis ecclesie, racionabili computacione cellerarii prehabita, prout omni anno fiet, communi utilitati ecclesie reserventur. Steura vero superioris officine, que singulis annis instituenda est secundum antiquam consuetudinem in die sancti Valentini residentibus canonicis omnibus presentibus et in unam summam totalem conputantibus, reservari et poni debet ad sacristiam sub custodia decani et duorum canonicorum ad hoc electorum tribus clavibus dissimilibus cum diligencia reservanda; cellerario se intromittente in nullo penitus de eadem, et cum illa pecunia, sana capituli deliberacione prehabita, vinum ematur annis singulis estivale vel vinea, si tandem possibilitas fiat, et si visum fuerit expedire. Si autem evidens et communis ecclesie nostre necessitas incumberet aliunde, que rite ostenderetur capitulo per cellerarium expediri non posse, debet eidem necessitati provide per eandem pecuniam subveniri. 9. Item ad eandem sacristiam reponi debent omnes pensiones ecclesiarum nostrarum, ut sine omni dilacione temporibus debitis inter canonicos residentes singulos debite distribuantur. Verum quamquam prefatus domnus Hertnidus prepositus prenarrata omnia inter statuta ecclesie et in registrum eorundem redegi (!) procuraverit, quia tamen morte preventus sub sigillis et scripturis auttenticis conplete non inveniuntur sufficienter stabilita, ne tam fructuosa et matura ordinacio aliquo ausu temerario deinceps in perpetuum violetur, ipsam presentis scripti serie innovamus nostrorum, scilicet Alberti prepositi et conmendaticii antedicti nec non Ottonis decani et capituli Maticensis predictorum, sigillorum appensione roborata. Actum et datum anno domini MCCCXXXIX.‘ 

Language: Latein

Notes: