In nomine sancte et individue Trinitatis, Fridericus secundus divina favente clemencia Romanorum Imperator semper Augustus, Jherusalem et Sicilie Rex. Cum instancia cottidiana nostra sit Ecclesiarum omnium Imperii nostri sollicitudo continua, non indigne ad statum ipsarum pacificum conservandum nostre benevolenciam ostendimus pietatis. Eapropter notum fieri volumus universis Imperii nostri fidelibus, quod Leupoldus Dux Austrie et Stirie dilectus Princeps noster in nostra presencia constitutus celsitudini nostre supplicavit humiliter et devote, ut privilegium, quod Dominus Hainricus Romanorum Imperator magnificus dive memorie Pater noster pie indulxit Ecclesie de Richersperg innovacione et confirmacione de gracia dignaremur. Cuius privilegii tenor talis est: In nomine sancte et indiuidue trinitatis heinricus Sextus diuina fauente clementia romanorum imperator semper augvstus et rex Sicilie. Ad eterni regis premium et temporalis imperii incrementum nobis proficere non ambigimus etc. (wie die Urkunde datum Wirtzburch am 7. October 1195). Nos autem supplicaciones prefati Ducis Austrie et Stirie dilecti Principis nostri favorabiliter admittentes ob illius intuitum, per quem feliciter vivimus et regnamus, et ob remedium animarum divorum augustorum Parentum nostrorum privilegium supradictum et quicquid continetur in eo, supradicto Monasterio duximus confirmandum, Eidem de speciali gracia indulgentes, ut, si eiusdem loci prepositus a principali Advocato sibi aliquem advocatum destinari pecierit, committatur ipsi absque iure beneficiali talis procuracio liceatque Preposito et fratribus, si inutilis et gravis ille fuerit, eum amovere et loco ipsius meliorem substituere. Statuimus igitur, ut nulla persona ecclesiastica vel secularis, alta vel humilis contra hoc confirmacionis nostre privilegium predictum Monasterium molestare presumat; quod qui presumpserit, preter indignacionem nostri culminis, quam incurret, penam centum librarum auri se noverit incursurum, quarum medietas camere nostre, reliqua passis iniuriam persolvatur. Ad huius autem confirmacionis nostre memoriam et robur perpetuo valiturum presens privilegium fieri et sigillo celsitudinis nostre iussimus communiri. Huius rei testes sunt Bertholdus Aquilegiensis Patriarcha, Eberhardus Salzburgensis Archiepiscopus, Sifridus Ratisponensis Episcopus, Leupoldus Dux Austrie et Stirie, Wernhardus Dux Carinthie, Otto Dux Meranie, Rapoto Palatinus Comes, Heinricus frater suus Comes de Ortenberch, Raynbertus de Murech, Hainricus de Prüne, Irinfridus de Hinnperch et alii quam plures. Acta sunt hec anno Dominice Incarnacionis MCCXXX. mense Aprili tercie Indiccionis, imperante Domino nostro Friderico Dei gracia invictissimo Romanorum Imperatore semper Augusto, Jherusalem et Sicilie Rege gloriosissimo, anno Imperij eius X. regni Jherusalem V. regni vero Sicilie XXXII. feliciter. amen. Data Fogie anno, mense et indiccione pretitulatis.

Source Fulltext: OÖUB 2 (Wien 1856) S. 685-686