Chuno dei gratia prepositus, Heinricus decanus totumque Capitulum ecclesie Salzburgensis tam presentibus quam futuris Imperpetuum. Quoniam aliquando improborum audacia et discordias suscitantium malitiosa obtrectatio peruertere solet, que rite fuerint ordinata, et pro quiete religionis concessa in dispendium nonnunquam pertrahere moliuntur, per curricula etiam temporum humana fragilitas obliuiscitur, quod suo tempore per graues labores et expensas non modicas obtinuit utiliter difiniri, vnde prouida deliberatione antiquitas bene statuit et nouitas perspiciens honestum et utile conseruauit, tam perturbantium bene gesta quam etiam per antiquitatem in obliuionem deducta per autenticam scripturam ad memoriam hominum reuocari(sic per omnia).Qua propter cum ecclesia Reicherspergensis per nobilem uirum de Hagenawe Lvdewicum et progenitores suos adeo fuerit ratione aduocatie et iniusti dominij deuastata, quod eius talis esset defectus, quod tam in spiritalibus quam in temporalibus in precipicium pertrahi uideretur et ut resurgeret, adicere non ualeret (sic), venerabilis in Christo pater et dominus Eberhardus secundus Salzburgensis archiepiscopus, qui condolens destrvctionj ipsius et reformationj intendens de sua solita pietate, qua religiosorum et deo famulantium semper utilitates promouit, per labores multos et expensas non modicas dictum nobilem ab eadem aduocatia totaliter separauit numeratam ei pecuniam, prout inter ipsos conuentum extitit, exsoluendo ita, quod ipsi renuntiaret omnino in suis manibus resignando et hoc in presentia curie sue et dominj Lvdewici uiri magnifici dvcis Bawarie Renique Palatyni et multorurn nobilium, qui eidem resignationi et tractatui interfuerunt, quorum consilio et auxilio est peracta, et preterea eandem aduocatiam idem pater venerabilis supradictus super altare beati Rvberti assignauit de consensu capituli et ministerialium hac condicione adiecta, ne ipse uel successores sui alicui de cetero infeodare ualeant, sed qui pro tempore Salzburgensis ecclesie archiepiscopus esset, ad manus suas sine aliquo emolumento teneret, priuilegium suum super hoc tam sigilli sui munimine quam subscriptione testium roboratum eidem ecclesie hylariter conferendo. Venerabiles igitur fratres prepositus et capitulum Reicherspergense uidentes, quia mundus in maligno est positus et non nocet abundans cautela, a nobis humiliter petierunt, quatenus tenore priuilegi (sic) sui perspecto litteras testimoniales nostras eis concedere dignaremur. Nos autem iusta petentibus desiderata noluimus denegare, sed petitioni eorum beniuolum prebere consensum, presens instrvmentum in supradictorum euidens testimonium cum apositione nostri sigilli duximus concedendum. Datum apud Salzburch X. Kalendas Octobris anno ab incarnatione domini M. CC. X. LII.

Source Fulltext: OÖUB 3 (Wien 1862) Nr. 113, S. 117-118