Nos Wernhardus Dei gracia Ecclesie Pataviensis Episcopus presentibus confitemur, quod, cum inter venerabilem fratrem Dominum Richerum Prepositum Ecclesie Richerspergensis ex parte una et Dominum Ottonem Decanum et Plebanum Ecclesie in Obernperg ex parte altera super iuribus Parrochialibus, transgressionibus et iniuriis et super Canonica porcione eorum venerabilibus fratribus Domino Hartungo de Echepaw et Meingoto iuniori de Waldekk Ecclesie nostre Canonicis iudicibus a nobis delegatis questio verteretur, dicte partes dilecto in Christo Domino Ortolfo de Mu^erring Ecclesie nostre Canonico et Magistro Johanni et Ottoni Capellanis nostris super premissis causis et articulis se arbitrio simpliciter submiserunt. Qui quidem arbitri cognitis cause meritis in hunc modum arbitrando arbitrium protulerunt: Nos Ortolfus de Murring Canonicus Ecclesie Pataviensis, Magister Johannes et Otto Notarius Capellani Reverendi Patris Domini Pataviensis Episcopi electi in arbitros a venerabili Domino Richero Preposito Ecclesie Richerspergensis ex parte una et a Domino Ottone Plebano et Decano in Obernperg ex parte altera et accepta potestate ab eisdem super composicione amicabili et complanatione litium et earum, que vertuntur inter eos super iuribus Parochialibus, in quibus utraque pars ab altera se lesam querulatur, super funeribus, super testamentis et Canonica porcione in futurum solvenda vel non cognitis cause meritis omnia dampna, omnes transgressiones et quascunque iniurias hinc inde datas tollimus et compensacione mutua abrogamus. Sed ut partes futuris temporibus recidive discordie laborintum non incidant sed in caritatis unione perseverent, arbitramur, ut funus quodcumque, quod de Obernperg Parrochia ex electione Canonica ad Reicherspergensis Ecclesie pertinet sepulturam, Prepositus et Conventus Reicherspergensis non deferant, nisi primitus eidem in Ecclesia Plebani de Obernperg exequiis funebribus celebratis. In quibus quidem exequiis dictus Plebanus morem geret Ecclesie Richerspergensis, dicta funera, quanto poterit, maturius expediendo ad eandem, ne per nimiam moram populus distrahatur vel Richerspergensi Ecclesie expensarum dispendium generetur. Cum autem funus huiusmodi ad Ecclesiam in Richersperg transferetur, licitum sit Plebano de Obernperg per se vel per alium sacerdotem in abside Monasterii Ecclesie Richerspergensis unam Missam legere presente funere et oblaciones in eandem Missam factas percipere nomine canonice porcionis, aliam canonicam porcionem nullatenus petiturus. Nos igitur predictum arbitrium rite latum et a partibus acceptatum ad instanciam ipsarum parcium auctoritate ordinaria confirmamus mandantes illud perpetuis temporibus inviolabiliter observari. In cuius rei testimonium presentes damus literas nostro sigillo munitas. Datum Patavie anno Domini MCCCXI. tercio idus Februarii.

Source Fulltext: OÖUB 5 (Wien 1868) Nr. 42, S. 45-46